Pajhwok Services

SMS News Service

Photo Service

Election Coverage

Special Mining Page

Afghan Peace Process Special Page

Addvertise With Pajhwok

Daily Newsletter

Language
Sending Time (GMT / Kabul time)

Suggest a Story

Pajhwok is interested in your story suggestions. Please tell us your thoughts by clicking here.

د غزني کروندګر خپلو حاصلاتو ته بازار او سړې خونې غواړي

د غزني کروندګر خپلو حاصلاتو ته بازار او سړې خونې غواړي

By
On
May 14, 2017 - 18:05

غزني ښار (پژواک، ٢٤ غويی ٩٦): په غزني کې يو شمېر کروندګر وايي چې په دې وروستيو کلونو کې يې د نورو توکو پر ځاى د پيازو کرلو ته مخه کړې خو د سړو خونو د نه شتون له امله اړ دي چې پياز هم په تاوان وپلوري.

د غزني د اندړو ولسوالۍ يوه کروندګر حميدالله د غويي په ٢٤مه پژواک خبري اژانس ته وويل چې له تېرو څلورو کلونو راهيسې په دې ولسوالۍ کې خلک د غنمو او نورو توکو پر ځاى د پيازو کرلو ته مخه کړې ده.

هغه وايي چې د سړو خونو د نه شتون له امله ډېرو کروندګرو د پيازو په کرلو کې هم تاوان کړى دى.

ده زياته کړه: ((د پيازو په وخت کې موږ دې ته مجبورېږو چې يو من پياز په ١٥ کلدارې هم خرڅ کړو، خو په ژمي بيا د خوراک لپاره مجبور يو چې يو من پياز په پنځه سوه کلدارې واخلو.))

دغه راز د ده يک يوه کروندګر عبدالباري هم پژواک ته وويل چې د دې ولسوالۍ ډېرى کروندګر هر کال په خپلو ځمکو کې پياز کري.

هغه وايي: ((تېر کال زما د پیازو حاصل نږدې دوه زره منه و، هېڅ خريدار يې نه درلود، شپږ سوه منه مې  يو من له ١٥ څخه تر پنځوس کلدارو پورې خرڅ کړل او پاتې نور مې ټول من په ١٣ کلدارې ورکړل.))

ده وويل چې د سړو خونو او پيازو ته د بازار د نه شتون له امله یې تېر کال ډېر تاوان کړى خو سږ په دې تمه دی چې د پيازو نرخ به ښه وي، بيا يې هم د پيازو کرلو لپاره نيت کړى دى.

د غزني د يو شمېر نورو ولسواليو کروندګرو هم ورته څرګندونې وکړې او له حکومت يې غوښتنه وکړه چې سړې خونې ورته جوړې کړي او د حاصلاتو لپاره يې بازار پيدا کړي.

په غزني کې يوه سوداګر حاجي عبدالغفور پژواک ته وويل چې تېر کال يې څو زره منه پياز، من په ٤٠ کلدارې اخيستې وو او بېرته يې بيا ٩٠ کلداري پلورلي دي.

هغه وايي: ((دغه پياز د ساتلو په موخه پاکستان ته وړل کېږي، هلته تر يوې مودې وروسته بېرته افغانستان ته راوړل کېږي، چې دلته پر خلکو من په درې سوه او څلور سوه کلدارې پلورل کېږي.))

ده هم ټينګار وکړ چې حکومت بايد د پيازو او نورو کرنيزو حاصلاتو د ساتنې په موخه سړې خونې جوړې کړي.

د اړوندې موضوع په اړه د غزني د کرنې او مالدارې رييس عبدالله تسل هم پژواک ته وويل چې په دې وروستيو کې د غزني ډېرو کروندګرو د نورو توکو پر ځاى د پيازو کرلو ته مخه کړې ده.

هغه وايي: ((غزني د غنمو لپاره ډېرې ښې ځمکې لري، خو خلکو يې د پيازو کرلو ته مخه کړې ده، پياز د غنمو پر پرتله ډېر زحمت هم غواړي او د پيازو د حاصل په وخت کې بيا يو من پياز په لس، پنځلس کلدارې پلورل کېږي، نو بايد د پيازو پر ځاى غنم وکرل شي.))

ده د غزني له کروندګرو غوښتنه وکړه، تر هغه چې په دغه ولايت کې سړې خونې جوړېږي نو د غنمو کرلو ته دې مخه کړي.

د تسل په وينا، په دغه ولايت کې د سړو خونو په اړه يې څو ځلې اړوند وزارت ته وړانديزونه ورکړي دي او هغوى هم ورسره په دې برخه کې ژمنې کړې دي.

غزني د افغانستان د کرنيزو ولايتونو له ډلې څخه دى چې د غنمو، پيازو او نورو سزيجاتو تر څنګ په کې مڼې، زردالو، انګور، الوچې، شفتالو او نورې مېوې هم ښه حاصل ورکوي.

Related Article

Add new comment

Advertisement

Advertisement

Twitter Update