زرنج (پژواک ٢٣ ليندۍ ٩٠): د درېيو افغانانو مړي، چې د ايران د سرحدي ځواکونو له خوا وژل شوي وو، په نيمروز کې د افغانستان سرحدي پوليسو ته وسپارل شول.
د ايران سرحدي ځواکونو درې ورځې وړاندې پر هغو افغانانو، چې د کار کولو په موخه د ايران زابل سيمې ته په لاره وو، ډزې وکړې، درې تنه يې ووژل او څلور نور يې ټپيان کړل.
د هرات د شينډنډ ولسوالۍ اوسېدونکى عبدالظاهر، چې په همدې ډله کې شامل وو، پژواک خبري اژانس ته وويل: “موږ ١٢ تنه په ايران کې د کار کولو لپاره، درې شپې وړاندې د يوه لارښود په مرسته د نيمروز له ميلک سيمې څخه، له ګډې پولې شاوخوا سل متره وړاندې لاړو، چې د ايران د سرحدي پوليسو تر بريد لاندې راغلو.”
هغه زياته کړه، چې په دې پېښه کې د ده د تره د زوى په گډون درې تنه ووژل شول او څلور نور ټپيان شول او پاتې کسانو د افغانستان په لور رامنډې کړې.
عبدالظاهر زياته کړه، چې فقر او بېکاري د دې لامل شوه، چې ايران ته د تللو هوډ وکړي او که په هېواد کې د کار زمينه ورته برابره شي، هېڅکله به ايران ته ولاړ نه شي.
هغه وويل، چې د وژل شويو درېيو تنو مړي د ايران سرحدي ځواکونو پرون مازديگر د افغانستان سرحدي پوليسو ته سپارلي او ټپيان يې د زابل روغتون ته لېږدولي دي.
د نيمروز ولايت د ورېښم پله په سيمه کې د سرحدي پوليسو مشر سمونیار پرویز پژواک ته وويل، چې د ايران سرحدي پوليسو د درېيو تنو مړي پرون مازديګر دوى ته سپارلي دي.
پرويز زياته کړه، چې د وژل شويو کسانو د يوه دوست په خبره، چې هغوى په غيرقانوني توګه له ګډې پولې څخه تېرېدل، چې پرې ډزې وشوې.
د نيمروز د مهاجرينو د چارو رييس محمداکبر چخانسوري پژواک ته وويل، چې مړي پرون ناوخته ولېږدول شول او دغه اداره د څلورو ټپيانو په اړه معلومات نه لري.
چخانسوري زياته کړه، چې د ولايت له چارواکو سره د تفاهم له لارې دغه موضوع څاري.
د دغو درېيو تنو مړي په داسې حال کې د ايراني پوليسو له خوا د افغانستان لوري ته سپارل شوي، چې د روانې مياشتې په شپږمه نېټه، د يوه افغان مهاجر مړى، چې پر اعدام د محکومېدو له وېرې يې د ايران په کرمان زندان کې قلبي سکته کړې وه، د ايران د سرحدي امنيتي چارواکو له خوا د نيمروز سرحدي پوليسو ته سپارل شوى و.
همدارنگه د روان کال د تلې په لومړۍ نېټه د فارياب ولايت ١٢تنه اوسېدونکي، چې د ايران د بندرعباس په لاره د يوې ترافيکي پېښې په ترڅ کې ټپيان شوي وو، په ټپي حالت او د روغتون په جامو کې د نيمروز را اړول شوي وو.
Visits: 3
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن