لښکرګاه (پژواک ١٠ کب ٩٠): د هلمندپه مرکز لښکرګاه ښارکې نن سهار دبهرنيو ځواکونو پر موټرو په شوي ځانمرګي بريد کې شپږ تنه ټپيان شوي دي.
دا پېښه نن (د کب ١٠مه) سهار شاوخوا لس بجې د لښکرګاه ښار د امنيه قوماندانۍ او ښاروالۍ ترمنځ پر سړک رامنځته شوه.
د هلمند د امنيه قوماندانۍ د امنيت امر سمونوال کمال الدين شېرزي د پېښې په ځاى کې پژواک خبري اژانس ته وويل، چې دغه ځانمرګى بريد د يوه کرولا موټر په وسيله شوى دى.
هغه زياته کړه، چې په دغه بريدکې يو پوليس او د درېيو ماشومانو په ګډون پنځه عام وګړي ټپيان شوي دي.
نوموړي په پېښه کې بهرنيانو ته له اوښتې مرګ ژوبلې بې خبري وښوده.
د ګلاب په نوم د پېښې يوه عيني شاهد پژواک خبري اژانس ته وويل، چې په ياده سيمه کې د بهرنيانو زغروال موټر روان و، چې ناڅاپه د يوه بل موټر په وسيله پرې چاودنه وشوه.
هغه زياته کړه: ((ما خپله وليدل، چې په دغه بريد کې يو بهرنى او يو شمېر ملکي وګړي ټپيان وو.))
د صاحب خان په نوم د پېښې يوه بل عيني شاهد، چې خپله هم په دغه بريد کې ټپي شوى، پژواک ته وويل، چې د بهرنيانو درې موټر روان وو، چې ناڅاپه چاودنه وشوه.
د نوموړي په وينا، ځانمرګي بريد کوونکي د بهرنيانو له دويم موټر سره ځان وجنګاوه او چاودنه يې رامنځته کړه.
هغه زياتوي، چې د بهرنيانو موټر هم زيانمن شوى او کېداى شي ځينې کسان يې ټپيان شوي هم وي.
د امنيت امر کمال الدين شېرزى وايي، چې ياد موټر په دغه ولايت کې د مېشتې بريتانوۍ ولايتي بيارغونې ډلې (پي ار ټي) اړوند وو او په کې مهم کسان سپاره وو.
د نوموړي په وينا، درې اونۍ مخکې هم په لښکرګاه کې د پي ار ټي پر کاروان ځانمرګى بريد شوى و او دغه امکان يې رد نه کړ، چې وسلوال مخالفين په دې اړه کره استخباراتي معلومات ترلاسه کوي.
وسلوالو طالبانو تر اوسه د ننني ځانمرګي بريد په اړه څه نه دي ويلي.
د روان لمريز کال د سلواغې په ٦مه د بهرنيانو پر ملکي موټرو په شوي ځانمرګي بريد کې درې تنه و وژل شول او ٣٤ نور ټپيان شوي وو، چې ډېرى يې عام وګړي وو.
د يادونې ده،چې دلښکرګاه ښار امنيت څو مياشتې مخکې افغان ځواکونو ته سپارل شوى،خو له دې پروسې وروسته په دغه ښار کې د چاودنو او ځانمرګو بريدونو پېښې زياتې شوې دي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن