ترينکوټ (پژواک ٢٢ کب ٩٠): د اروزګان په خاص اروزګان ولسوالۍ کې د سيمې د يوه اوسېدونکي له خوا دوه پوليس و وژل شو.
د دغه ولايت د امنيه قوماندانۍ جنايي مدير سمونوال ګلاب خان د کب په ٢٢مه پژواک خبري اژانس ته وويل، چې دا پېښه تېره شپه په خاص اروزګان ولسوالۍ کې رامنځته شوې ده.
هغه زياته کړه، چې د دې ولسوالۍ دوه پوليس د سيمې د يوه اوسېدونکي له خوا وژل شوي، خو نوموړي يې د وژل کېدو لامل په ګوته نه کړ او زياته يې کړه، چې د پلټنو په موخه سيمې ته يو پلاوى لېږدول شوى دى.
خو د سيمې يوه اوسېدونکي، چې د نوم له څرګندولو يې ډډه کوله پژواک اژانس ته وويل، چې ياد پوليس د سيمې د يوه اوسېدونکي کور ته د غلا لپاره ور اوښتي وو.
د نوموړي په وينا، کله چې د کور مالک پرې راوېښ شوى، ډزې پرې کړې او دواړه پوليس يې وژلي دي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن