کابل (پژواک١٧ ورى ٩١): تېر کال د افغانستان دولت د ډبرو سکرو له لارې ٤٢،٩ ميليون امريکايي ډالره عايد درلود. چې د وړم کال په پرتله ٨٨ سلنه زياتوالى ښيي.
د کانونو وزارت د معلوماتو له مخې، په بغلان، باميانو او سمنګان ولايتونو کې د ډبرو سکرو له کانونو څخه استخراج کېږي.
د کانونو وزارت وياند جواد عمر د وري په ١٧مه پژواک خبري اژانس ته وويل، چې دولت په ١٣٨٩ کال کې له يادو کانونو څخه ٢٢،٨ ميليونه امريکايي ډالر عايد درلود.
د ډبرو سکرو له کانونو څخه استخراج د کانونو وزارت اړوند د شمال د ډبرو سکرو د تصدۍ له خوا ترسره کېږي.
د دې تصدۍ مشر انجنير عبدالخالق تصميم وايي، چې تېر کال له يادو کانونو څخه شاوخوا يو ميليون او ٤٢٣ زره ټنه د ډبرو سکاره استخراج شوي دي.
دى زياتوي، تېر کال په يادو کانونو کې تر ټولو ډېر استخراج د باميانو له کانونو څخه شوى دى.
د هغه په وينا، په ١٣٨٩کال کې له يادو کانونو څخه د ډبرو سکرو د استخراج کچه څه باندې ٧٥٢ زره ټنه وه.
تصميم وايي، د وړم کال په پرتله تېر کال پاکستان ته له افغانستان څخه د ډبرو سکرو صادرات زيات شوي وو او دغه کار په افغانستان کې د ډبرو سکرو د ډېر توليد او عايد لامل شوى دى.
هغه زياته کړه: ((تېر کال زموږ د پلورل شوو سکرو شاوخوا ٦٠ سلنه پاکستان ته صادر شوي، چې دا په خپله يوه ستره تقاضا وه او زموږ د توليد او عوايدو کچه يې هم لوړه کړه.))
د ترلاسه شوو شمېرو له مخې، د وړم او تېر کال د پلورل شوو ډبرو سکرو په کچه کې ٨٩ سلنه زياتوالى ښيي.
تصميم په دې اړه، چې ولې د وړم او تېر کال د پلورل شوو ډبرو سکرو او عوايدو په کچه کې يو سلنه توپير شتون لري، وويل، چې تېر کال د وړم کال په پرتله هغه سکاره ډېر پلورل شوي چې بيه يې ټيټه ده.
د ده په وينا، دوه ډوله د ډبرو سکاره له يادو کانونو څخه ترلاسه کېږي، يو ډول ټن په ٢١٠٠ افغانۍ او بل ډول يې په ١٥٠٠ افغانۍ پلورل کېږي.
د سرچينې د څرګندونو له مخې، په ١٣٨٩کال کې د پلورل شوو ډبرو سکرو له کچې څخه ١٨زره او ٣٤٩ ټنه، في ټن په ٢١٠٠ افغانۍ پلورل شوي وو، په داسې حال کې چې په ١٣٩٠ کال کې د پلورل شوو سکرو له کچې څخه ١٦ زره او ٩٢٣ ټنه، في ټن په ٢١٠٠ افغانيو پلورل شوي وو.
د کانونو وزارت د معلوماتو له مخې، د شمال د ډبرو سکرو تصدۍ په ١٣٨٦کال کې ٢٥٧٠ ټنه، په ١٣٨٧ کال کې ٣٤٦٩ ټنه او په ١٣٨٨ کال کې څه باندې پنځه زره ټنه د ډبرو سکاره استخراج کړي وو.
د کانونو وزارت د معلوماتو له مخې، د باميانو، بغلان او سمنګانو ولايتونو ترڅنګ په بدخشان او هرات ولايتونو کې هم د ډبرو د سکرو کانونه شتون لري، خو تر اوسه استخراج شوي نه دي.
Visits: 5
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن