محمود راقي (پژواک ١٨ ورى ٩١):د کاپيسا ولايت په تګاب ولسوالۍ کې د ملي اردو او پوليسو په چاڼيزو عملياتو کې څلور ملکي وکړي وژل شوي او دوه نور ټپيان دي.
دغه څرګندونې د کاپيسا د ولايتي شورا غړي نجيب الله رحيمي د وري په ١٨مه ، پژواک خبري اژانس ته وکړې.
هغه وويل ، چې په وژل شويو کسانو کې دوه نجونې،يوه مېرمن او يو ماشوم شامل دي او ټپيان هم دوه ماشومان دي .
د سرچينې د څرګندونو له مخې، ملي اردو او پوليسوله تېرو درېيو ورځو راهېسې د تګاب ولسوالۍ په ميراخېل ، ادېزيو او سنزيو سيمو کې چاڼيز عمليات پېل کړي دي .
د هغه په وينا، دغه مرګ ژوبله په هغو عملياتو کې ، چې د وسلوالو مخالفينو لخوا ورسره په سيمه کې وسلوال مقاومت هم کېږي ، پرون مازيګر رامنځته شوې ده .
د تګاب ولسوال عبدالحکيم اخندزاده هم په دې عملياتو کې د ملکي وګړيو ياده مرګ ژوبله تاييدوي .
خو د ۲۰۱ سيلاب قول اردو وياند ډګروال نعمان هاتفي بيا وايي، چې دوی د دولت يو شمېر مخالفېن وژلي او يو شمېر سيمې يې د دولت له مخالفينو څخه پاکې کړې دي.
هغه په دغو عملياتو کې د ملکي وګړيو د مرګ ژوبلې په اړه څه ونه ويل، خو زياته يې کړه چې په دغو عملياتو کې ٨ وسلوال مخالفين وژل شوي او ٨ نور ژوندي نيول شوي دي .
وسلوالو طالبانو تراوسه په دې اړه څه نه دي ويلى .
د يادونې ده ،چې تېره ورځ هم په تګاب ولسوالۍ کې شپږو عامو وګړيو ته مرګ ژوبله اوښتې وه.
Visits: 2
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن