اسلام اباد (پژواک ٨ غويى ٩١): پاکستاني چارواکي وايي، چې د اسامه بن لادن دکورنۍ غړي يې خپل هېواد سعودي عربستان ته لېږلي دي.
امريکايي ځواکونو د تېر لمريز کال د غويي په مياشت کې د پاکستان د خيبر پښتونخوا ايالت په ايبټ اباد ښار کې عمليات ترسره کړل او د القاعدې مشر اسامه بن لادن يې وواژه.
وروسته امريکايي ځواکونو وويل، چې د هغه مړى يې په سمندر کې غورځولى دى.
د پاکستان د کورنيو چارو وزير رحمان ملک په اسلام اباد کې، څه وخت مخکې خبريالانو ته ويلي و، چې د اسامه د مېرمنو پر ضد د پاکستان د قانون له مخې ، دوسيه پرانېستل شوې او دوى درې ورځې مخکې اسلام اباد ته راوستل شوي دي.
د اسامه بن لادن تر وژل کېدو وروسته،د هغه درې مېرمنې او يوولس ماشومان پاکستانيو چارواکو په نامعلوم ځاى کې ساتلي وو؛ خو د پاکستان د کورنيو چارو وزير يې په اړه معلومات نه ورکول.
د پاکستان د کورنيو چارو وزارت يوې باوري سرچينې د غويي په ٨ مه پژواک اژانس ته وويل، چې د پاکستان د کورنيو چارو وزارت له لوري له محکمې وروسته تېره شپه ناوخته شاوخوا ١٢ بجې د القاعده ډلې پخواني مشر اسامه بن لادن د کورنۍ غړي يې د پاکستان له پلازمېنې اسلام اباد څخه سعودي ته ولېږل.
د سرچينې په وينا، د اسامه بن لادن کورنۍ مخکې له تلو څخه په اسلام اباد کې زنداني وه.
له پاکستان څخه تللې په دغه کورنۍ کې د اسامه بن لادن يوه يمنۍ او دوه سعودۍ کونډې ښځې او يوولس اولادونه يې شامل وو، چې تېره شپه د بې نظير بوټو نړيوال هوايي ډګر څخه د سعودي عربستان په يوه خصوصي الوتکه کې لاړل.
ويل کېږي، چې د اسامه کورنۍ به لومړى سعودي ته ځي او بيا به د هغه يوه يمنۍ کونډه او د هغې دوه اولادونه يمن ته ولېږدول شي.
د يادونې ده، چې د روانې اپرېل مياشتې په دويمه په اسلام اباد کې يوې ځايي محکمې د اسامه بن لادن دکورنۍ غړي په پاکستان کې په ناقانونه توګه د اوسېدو په جرم د ٤٥ ورځو بند په سزا محکوم کړي وو.
Visits: 4
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن