کابل (پژواک، ٥ غبرګولى ٩١) : د فرانسې ولسمشر نن د يوه رسمي سفر په ترڅ کې په داسې حال کې کابل ته راغلى، چې ټاکل شوې، دغه هېواد د روان زيږديز کال تر پايه خپل ټول سرتېري له افغانستان څخه وباسي.
د ولسمشر حامد کرزي د وياند مرستيال سيامک هروي پژواک خبري اژانس ته وويل ، چې د فرانسې ولسمشر فرانسوا اولاند Francois Hollande نن د( غبرګولي په پنځمه ) کابل ته راغلى دى .
هغه زياته کړه، ټاکل شوى ده، چې دفرانسې ولسمشر له حامد کرزي او په افغانستان کې مېشتو فرانسوي سرتېرو سره وګوري .
د فرانسې ولسمشر داسې مهال افغانستان ته سفر کوي ، چې د ياد هېواد چارواکيو مخکې ويلي و ، چې د روان زېږديز کال تر پايه پورې به خپل ټول سرتېري له افغانستان څخه وباسي .
فرانسه په افغانستان کې څه دپاسه څلور زره سرتېري لري ، چې ډيرى يې په کاپيسا ولايت کې مېشت دي. ددغه هېواد څلور سوه سرتېري په ٢٠١١ زېږديز کال کې له افغانستان څخه تللي دي او ټاکل شوې ده ، چې د وتلو دغه بهير يې د روان کال تر پايه بشپړ شي .
تر اوسه په افغانستان کې د فرانسې له ٨٠ زيات سرتېري وژل شوي دي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن