جلال اباد (پژواک ٢٦ غبرګولى ٩١): په ننګرهار کې امنيتي مسوولين وايي، چې د يوې چاودنې له امله درې سرحدي پوليس وژل شوي او يو بل ټپي دى.
د دغه ولايت د لومړي زون سرحدي پوليسو د مطبوعاتي دفتر مسوول محمدادريس مومند پژواک ته وويل، چې پرون مازيګر ناوخته د سره رود ولسوالۍ د فتح اباد په سيمه کې د سرحدي پوليسو يو رينجر موټر هغه مهال د سړک غاړه پر ماين ور برابر شو، چې له بايمټريک معايناتو وروسته خوګياڼو ولسوالۍ ته روان و .
مومند وويل، چې په دې پېښه کې د سرحدي پوليسو رينجر موټر په بشپړه توګه له منځه تللى او په کې سپاره درې پوليس وژل شوي او يو بل ټپي دى.
وسلوالو طالبانو لا تر اوسه د دې پېښې په اړه څه نه دي ويلي.
دغه راز د ننګرهار امنيتي مسوولين وايي، چې د خوګياڼو په ولسوالۍ کې د يو پخواني جهادي قوماندان محمدعمر دوو ساتونکو په خپل منځ کې ډزې کړې، چې دواړه وژل شوي دي.
د يادونې ده، درې ورځې وړاندې هم د سره رود ولسوالۍ په فتح اباد سيمه کې د ملي اردو پر رينجر موټر چاودنه شوې وه، خو مرګ ژوبله يې نه لرله.
Visits: 2
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن