لښکرګاه (پژواک ٢٥ زمرى ٩١): د هلمند چارواکي وايي، چې د ماين په يوه چاودنه کې څلور قومي مشران وژل شوي دي.
د والي وياند داوود احمدي د زمري په ٢٥مه پژواک خبري اژانس ته وويل، چې دا چاودنه تېر ماخوستن د کجکي ولسوالۍ د قاضي خېلو په سيمه کې شوې ده.
هغه زياته کړه، چې په دې پېښه کې د دې ولسوالۍ څلور قومي مشران مولوي خيرالله، حاجي عبدالغفور، حاجي قدرت الله او موسى كليم وژل شوي دي.
د احمدي په وينا، ياد قومي مشران د تراوېح لمانځه ته روان وو، چې په لاره کې پرې خښ شوى ماين والوت.
د هلمند د ولايت مقام دغه چاودنه او د څلورو قومي مشرانو وژل کېدل په کلکه غندلي او کورنيو ته يې د ډاډګېرنې مراتب وړاندې کړي دي.
د ولايت له خوا په يوه خپره شوې خبرپاڼه کې راغلي، چې ترهګر تل پر لارو او سړکونو ماينونه خښوي چې له امله يې بېګناه عام وګړي وژل کېږي.
د دې چاودنې مسووليت تر اوسه چا پر غاړه نه دى اخيستى.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن