جلال اباد (پژواک ١٨ وږى ٩١): د ننګرهار چارواکي وايي، چې د امريکا کانګرېس د درونټې برېښنا بند د درېيو توربينونو د رغولو په موخه ٣١ ميليونه ډالر بېل کړي، چې د USAID له لارې به يې ولګوي.
د ننګرهار والي ګل اغا شېرزي نن (د وږي ١٨مه) په يوه خبري ناسته کې وويل، چې وړمه ورځ د امريکا يو شمېر ملکي او پوځي چارواکو ورته ويلي، چې دغه پيسې د امريکا له کانګريس څخه منظورې شوې دي.
د هغه په وينا، د امريکا د پرمختيايي ادارې (USAID) مشر ډاډ ورکړى، چې په يوه نيمه مياشت کې به د ياد برېښنا بند د درېيو توربينونو د بيا فعالولو د قرارداد داوطلبي ترسره شي.
نوموړي زياته کړه، چې د امريکا دولت ورته سپارښتنه کړې، چې د پروژې لس سلنه لګښت بايد افغان دولت ورکړي.
ګل اغا شېرزي وويل: ((پنځه لکه ډالر ما له شېرزي فونډېشن څخه ورکړي او پاتې دوه نيم ميليونه ډالر به له ولسمشر او ماليې وزير څخه واخلم.))
د ده په خبره، هغه پروژه چې تېر کال د يوې روسۍ کمپنۍ له لوري د پنځه ميليونه ډالرو په لګښت پيل شوې وه، بشپړه ناکامه ده.
د ننګرهار والي وويل، روسۍ کمپنۍ په يوه کال کې يو ټوربين رغولى، چې هغه هم اوس له کاره لوېدلى دى.
د ننګرهار د والي وياند احمدضيا عبدالزي پژواک اژانس ته وويل، د دې لپاره چې پروژه په بشپړ روڼوالي ترسره شي، والي د محکمې، څارنوالۍ او ملي امنيت استازو په ګډون ورته يوه کمېټه جوړه کړې، چې د کار څارنه يې وکړي.
د ننګرهار د برېښنا رييس انجنير محب الرحمن مومند يوه مياشت وړاندې له پژواک سره په مرکه کې ويلي وو، چې د بيارغونې له امله د درونټې د برېښنا د توليد اندازه له نهو څخه دوولس مېګاواټو ته لوړه شوې ده.
دا چې د ننګرهار والي د روسانو پيل شوې پروژه نا کامه وبلله، هڅه مو وکړه د ياد رييس نظر واخلو، خو بريالي نه شوو.
د يادونې ده، د درونټې بند په ځينو برخو کې درزونه کړي، چې چټکې رغونې ته اړتيا لري.
د ٢٠١ سېلاب قول اردو مطبوعاتي مسوول ډګروال نغمان هاتفي پژواک اژانس ته وويل، قول اردو يې هڅه کوي چې د برېښنا بند ته څېرمه د ماين پاکۍ موسسه د نا چاودو مهماتو له چوولو منع کړي، ځکه په دې سره د برېښنا بند ته زيان رسېږي.
Visits: 12
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن