غزني (پژواک ١٥ لېندۍ ٩١): د غزني امنيه قوماندان وايي، په غزني ښار کې امنيې قوماندانۍ ته څېرمه د چاودنې له امله شپږ تنه ټپيان شول.
د غزني امنيه قوماندان زړور زاهد پژواک خبري اژانس ته وويل، چې دغه پېښه نن مازيګر ناوخته شاوخوا ٥ بجې د ريموټ کنټرول ماين د چاودنې له امله رامنځته شوه.
ده زياته کړه، ريموټ کنټرول ماين امنيه قوماندانۍ ته نږدې د باختر بانک مخې ته اېښودل شوى و، چې وروسته چاودنه ورکړل شوه.
امنيه قوماندان وايي، په دې چاودنه کې ٤ ملکي وګړي او دوه پوليس ټپيان شوي دي.
د ده په وينا، د چاودنې له امله د هغه مارکېټ ښيښې هم ماتې شوې، چې د باختر بانک څانګه ده په کې.
خو د غزني د ولايتي روغتون مشر ډاکتر بازمحمد همت وويل، چې دوى ته ټپي شوي پنځه پوليس ور وړل شوي دي.
د وسلوالو طالبانو وياند ذبيح الله مجاهد ويلي، چې د غزني د امنيه قوماندانۍ مخې ته يې د تاکتيکي چاودنې له امله ٧ پوليس وژلي او ٥ نور ټپيان کړي دي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن