کندوز، هرات : ( پژواک ۱۶ ليندۍ ۹۱): په کندوز ولايت کې يو سوداګر له تښتولو وروسته ووژل شو.
د سمنټو دغه سوداګر محمد صادق نومېده او دلوی اختر په څلورمه دکندوز ښار له شير خان بندر څخه وتښتول شو ، چې جسد يې اوس دابدان دښتې په غونډيو کې وموندل شو .
د حاجي ګل ولي په نوم يوه سوداګر پژواک خبري اژانس ته وويل ، چې دغه سوداګر د کندوز د مرکز په خاک کني سيمه کې ژوند کاوه او تاجکستان هېواد ته يې د سمنټو د ليږد سوداګري کوله .
هغه زياته کړه ، چې محمدصادق په مرميو ويشتل شوی او له چا سره يې شخصي دښمني نه درلوده .
د شيرخان بندر يوه بل سوداګر محمد افضل وويل ، چې دا ډول پېښې د سوداګرو او شخصي متشبثينو په فعاليت منفي اغېز لري او ددې لامل ګرځي ، چې هغوی پانګې اچونې ته زړه ښه نه کړي.
هغه زياته کړه : (( پوليس بايد په دې اړه جدي تدا بير ونيسي .))
خو دکندوز د امنيه قوماندانۍ د مطبوعاتو مسوول سيد سرور حسيني ، ددغه سوداګر د وژنې دپخلي ترڅنګ وويل :(( موږ هر وخت هڅه کړې ، چې دهېواد د ملي سوداګرو امنيت وساتو .))
د حسيني په وينا، چې تېره اونۍ پوليسو په کندوز کې يوه داسې څلور کسيزه ډله نيولې ، چې دملي سوداګر جاويد الهام او دکندوز ديوې ښځينه ډاکټرې د زوی په تښتولو کې يې لاس درلود. دغه دوه کسان څه موده وړاندې دپوليسو دعملياتو په پايله کې له تښتوونکو را خلاص شول .
بلخوا په هرات ولايت کې يو سرحدي پوليس افسر ووژل شو.
د لوېديځې حوزې د سرحدي پوليسو رييس ارکان سمونوال ګل آغا الهام وويل ، چې محمد هاشم تېر ماښام ددوو موټر سايکل سورو وسلوالو لخوا په غوريان ولسوالۍ کې ووژل شو او د څلورم سرحدي زون په قوماندانۍ کې يې دنده درلوده .
ده وويل، چې بريدګر تښتېدلي او پوليسو يې دنيولو هڅې پيل کړې دي .
ديوه بل خبر له مخې ، په هرات کې يو ماين اېښودونکی ووژل شو .
په هرات کې د ۲۰۷ ظفر قول اردو مطبوعاتي مسوول ډګروال نجيب الله نجيبي وايي ، چې په رباط سنګي ولسوالۍ کې درې ماين اېښودونکو د ملي اردو په ورتلو دتېښتې په حال کې و ، چې يو يې په ډزو ووژل شو او دوه نور يې ټپيان شول .
هغه زياته کړه ، چې د امنيتي سرتېرو دله منځه وړلو په نيت ، دغه ايښودل شوی ماين دملي پوليسو له لوري شنډ شو .
رباط سنګی ولسوالۍ له ترکمنستان او بادغيس ولايتونو سره ګډه پوله لري ، سيمه ييز چارواکي وايي ، چې له بادغيس ولايت څخه ورته وسلوال مخالفين د ورانکارو کړنو لپاره ور اوړي .
وسلوالو مخالفينو تر اوسه په دې اړه څه نه دي ويلي .
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن