کابل (پژواک ٦ سلواغه ٩١): د جورجيا د دفاع وزارت اعلان وکړ، چې په افغانستان کې يې درې سرتېري ټپي شوي دي.
د دفاع وزارت له خوا د سلواغې په ٦مه په يوه خپره شوې خبرپاڼه کې راغلي، چې دا پېښه پرون په هلمند ولايت کې رامنځته شوې ده.
سرچينې زياته کړې، چې د هلمند ولايت په مربوطاتو کې د دوى سرتېري پر ګزمه بوخت وو، چې د سړک غاړې د ماين چاودنه پرې وشوه.
سرچينې ويلي، چې په دې چاودنه کې يې درې سرتېري ټپي شوي، خو روغتيايي حالت يې د ډاډ وړ ښودل شوى دى.
په افغانستان کې مېشتو ايساف ځواکونو تر اوسه په دې اړه څه نه دي ويلي.
جورجيا د ايساف په چوکاټ کې شاوخوا ١٦٠٠ سرتېري لري چې په هلمند ولايت کې مېشت دي، تر اوسه يې ٢٠ سرتېري وژل شوي او تر ٩٠ پورې نور يې ټپيان دي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن