ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

په کونړ کې د لاسي صنايعو نندارتون جوړ شو

author avatar
11 Mar 2013 - 19:16
author avatar
11 Mar 2013 - 19:16

اسعداباد (پژواک، ٢١ کب ٩١): په کونړ کې په لومړي ځل د ښځو د لاسي صنايعو د خرڅلاو درې ورځنى نندارتون جوړ شو.

د ښځو او ماشومانو د ظرفيت لوړونې موسسې مشرې نوريې منصف پژواک خبري اژانس ته وويل، ياد نندارتون يې نن د ولايت په مقام کې په لاره واچاوه، چې درې ورځې به دوام وکړي.

هغې زياته کړه، دې نندارتون د کونړ د ښځو له لاسي صنايعو سربېره د ننګرهار، کابل او پروان ولايتونو مېرمنو خپل لاسي صنايع د خرڅلاو لپاره راوړي دي.

د نوموړې په وينا، له دې لارې غواړي ښځو ته کار وکړي او د هغوى د اقتصاد د ښه کولو لپاره هڅه وکړي.

د کونړ د ښځو چارو رييسه نسيمه شفيق سادات بيا وايي، دا لومړى ځل دى چې په دې ولايت کې د ښځو د لاسي صنايعو د خرڅلاو لپاره دا ډول نندارتون جوړېږي.

هغې د کونړ له نورو مېرمنو هم وغوښتل، چې خپل لاسي صنايع دې نندارتون ته راوړي.

نوموړي د دې ترڅنګ چې د دې نندارتون په جوړولو يې خوښي وښوده، له نورو مرسته کوونکو موسسو يې هم وغوښتل، چې د ښځو د پرمختګ لپاره دا ډول هڅې وکړي.

د کونړ والي سيدفضل الله وحيدي د دې نندارتون په مراسمو کې وويل، د دې ولايت د ښځو د لاسي صنايعو د بازار موندنې لپاره يې په څلورنيم جريبه ځمکه کې د يوه پارک د جوړولو چارې پيل کړې دي.

دى زياتوي، په دې پارک کې دوه پوړيز مارکېټونه هم جوړېږي، چې ښځې به په کې خپل لاسي صنايع پلوري.

هغه د کونړ د ښځو د پرمختګ لپاره په هره مياشت کې د سل زرو افغانيو د مرستې اعلان هم وکړ.

د ننګرهار د ښځو چارو رييسې انيسې عمران وويل: “کونړ ته د نورو ولايتونو د مېرمنو راتګ په هېواد کې د سولې او يووالي پيغام له ځان سره لري.”

د نندارتو ن يوې ګډونوالې نيلوفر پژواک ته وويل، سره له دې چې په لومړۍ ورځ دومره څوک نه وو راغلي، خو بيا يې څو جوړه ښځينه جامې پلورلې دي.

Visits: 0

ورته موضوع

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.