ميمنه ( پژواک د غويي لومړۍ نېټه ٩٢) : چارواکي وايي، د فارياب ولايت په بېلابېلو سيمو کې له تېرې ورځې راهيسې يو ملکي وګړى او دوه امنيتي کسان وژل شوي دي .
د دې ولايت د دولت اباد ولسوال عبدالسلام نزهت پژواک خبري اژانس ته وويل، چې تېره شپه ناپېژانده وسله والو د دې ولسوالۍ په خيراباد سيمه کې د عبدالستار په نوم يو تن وواژه.
د هغه په وينا، عبدالستار مخکې د سي آى پي ( CIP ) په نوم له هغې ډلې سره کار کاوه ، چې امريکايي ځواکونو تمويلول .
خو دى وايي، ستار وروسته له هغه چې امريکايي ځواکونه له دې ولايت څخه وتلي ، په افتخاري ډول په يوه امنيتي پوسته کې کار کاوه .
يوې امنيتي سرچينې ،چې نه يې غوښتل نوم يې څرګند شي، وويل، چې ستار په ياده سيمه کې د خپل کور مخې ته د وسله والو په کمين کې وژل شوى دى.
د وسله والو طالبانو وياند ذبيح الله مجاهد وايي، چې ستار د “اربکيانو” قوماندان و او د دوى کسانو وژلى دى .
د نزهت د معلوماتو له مخې ، د دولت اباد ولسوالۍ د امنيه قوماندانۍ يو تن پوليس هم نن سهار ووژل شو.
د ده په وينا ، دغه پوليس د رخصتۍ لپاره د دې ولايت په سبزپوش ولسوالۍکې خپل کور ته تللى و او نن د بېرته ستنېدو پر مهال په همدې ولسوالۍ کې د وسله والو مخالفينو په کمين کې ووژل شو.
د سبز پوش ولسوال وايي، چې دغه پوليس د دې ولسوالۍ په بادغيسي کلي کې وژل شوى او وسله يې هم وسله والو مخالفينو وړې ده .
طالبانو ويلي ، چې دغه تن دوى وژلى دى .
دغه راز د فارياب د شېرين تګاب ولسوال سيدلقمان وايي، چې تېره ورځ وسله والو د دې ولسوالۍ په جلاير سيمه کې يو ٤٠ کلن ملکي وګړى وژلى دى .
هغه وايي، دغه تن کومه دولتي دنده نه لرله او غره ته د سون لپاره د لرګيو د راټولولو په موخه تللى و ، چې ووژل شو.
د ياد ولو ده ، چې تېره ورځ وسله والو طالبانو ددې ولايت په قيصار ولسوالۍ کې د جنبش پخوانى قوماندان آقا رحيم وژلى و .
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن