هرات (پژواک ٢٤ غويى ٩٢): چارواکي وايي، چې د هرات په شينډنډ کې يې په يو جومات کې شپږ ماين جوړوونکي او شاوخوا سل کيلوګرامه چاودېدونکي توکي نيولي دي.
په هرات کې د ٢٠٧ ظفر قول اردو وياند ډګروال نجيب الله نجيبي د غويي په ٢٤مه پژواک خبري اژانس ته وويل، دغه کسان يې تېره شپه د شينډنډ په عزيز اباد سيمه کې نيولي دي.
د نوموړي په وينا، دغه ماين جوړوونکي يې د يو کشفي راپور له مخې، چې غوښتل يې په ښار کې چاودنه ترسره کړي، ونيول.
دغه کسان په داسې حال کې نيول کېږي، چې د هرات په ګډون د لوېديځ په څلورو ولايتونو کې د عقاب په نوم عمليات روان دي.
د يو بل خبر له مخې، د هرات پوليسو د شراب جوړولو يوه دستګاه له منځه وړې او ١١٠ بوتله شراب يې ترلاسه کړي دي.
د امنيه قوماندانۍ وياند سمونوال عبدالرووف احمدي پژواک اژانس ته وويل، چې دغه دستګاه يې د ګذرې ولسوالۍ په يو کور کې ومونده او له منځه يې يووړه.
د نوموړي په وينا، د کور څښتن په تېښته بريالى شوى او پوليسو يې د نيولو هڅې پيل کړې دي.
Visits: 4
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن