کندهار (پژواک ١١ چنګاښ ٩٢): په کندهار کې هوايي بريد او په دوو ماين چاودنو کې لس وسله وال طالبان وژل شوي دي.
د ياد ولايت د رسنيو له دفتره پژواک اژانس ته په رالېږل شوې خبرپاڼه کې راغلي، چې پرون مازديګر په ميانشين ولسوالۍ کې څلور وسله وال د ناټو هوايي بريد ووژل.
خبرپاڼه کاږي، چې يادو څلورو وسله والو غوښتل د ميانشين په منډي سيمه کې ورانکاره کړنې ترسره کړي، چې د ناټو الوتکو په نښه کړل.
د خبرپاڼې له مخې، د وژل شوو کسانو وسلې او مهمات د امنيتي ځواکونو لاس ته ورغلي دي.
دغه راز خبرپاڼه زياتوي، چې پرون ماښام په پنجوايي او ژېړۍ ولسواليو کې د خپل ماين چاودنو شپږ وسله وال ووژل.
سرجينه زياتوي، چې درې وسله وال په پنجوايي کې پر خپل ماين ختلي او وژل شوي او درې نور په ژېړۍ کې د ماين خښولو پر مهال د خپل ماين چاودنې وژلي دي.
دا په داسې حال ده، چې يوه اونۍ مخکې د کندهار په شاوليکوټ کې د يوې کورنۍ ١١ غړي د سړک غاړې ماين ووژل.
طالبانو په ماين چاودنو او هوايي بريد کې د خپلو ملګرو د وژل کېدو په اړه څه نه دي ويلي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن