کندز (پژواک ٧ زمرى ۹۲): د کندوز ولايت د چهار درې ولسوالۍ لپاره د طالبانو نومول شوى ولسوال له خپلو درېيو ملګرو سره وژل شوى او ٢٩ وسله وال مخالفين نيول شوي دي.
د کندوز د امنيه قوماندانۍ مطبوعاتي مسوول سيد سرور حسيني نن په خبري غونډه کې وويل، دغه شمېر کسان تېره شپه د ملي پوليسو د ځانګړې قطعې د عملياتو په پايله کې د کندوز د مرکز اړوند د ګورتپې په سيمه کې وژل شوي دي.
هغه زياته کړه، چې په وژل شوو کې د چهاردرې لپاره د طالبانو ولسوال قاري لطيف او په کندوز کې د نظامي عملياتو پلانوونکى هم شامل دي.
د حسيني په وينا، قاري لطيف د کندوز ښار په يوه ځانمرګي بريد او د دوو پوليسو په وژنه کې ښکېل و.
د روان کال په لومړيو کې هغه ځانمرګى بريد، چې په کندوز کې ترسره شو، د ترهګرۍ پر ضد د مبارزې مدير، د ترافيکو مدير له لسو نورو ملکي کسانو سره ووژل شول.
هغه زياته کړه، چې په دغو عمليات کې شپږ تنه نيول شوي او څلور ميله وسله هم د دوى لاس ته ورغلې ده.
حسيني وويل، د نن سهار په عملياتو کې چې د چهار درې ولسوالۍ په جنګل کولابي سيمه کې پيل شوي، ١٧ وسله وال نيول شوي هم دي، خو هغوى خپلې وسلې ځنګله ته اچولې او پوليس د موندلو په لټه کې دي.
د دغه پوليس چارواکي په وينا، د دشت ارچي ولسوالۍ په ارباب زرغون سيمه کې هم د طالبانو د پوځي قوماندان په ګډون شپږ تنه وسله وال نيول شوي دي.
په دغو عملياتو کې ملي او سيمه ييزو پوليسو، ملي اردو او د ملي امنيت ځواکونو ګډون کړى دى.
خو طالب وياند ذبيح الله مجاهد وايي، چې دوى په دشت ارچي ولسوالۍ کې د دولتي ځواکونو پر يوې ګزمې بريد کړى، چې په کې د معاون مامي په نوم د يوه قوماندان په ګډون څلور اربکيان وژل شوي دي او پنځه نور ټپيان دي.
د هغه په ادعا، د دوى کسان د د شت ارچي ولسوالۍ په تيميوريانو سيمه کې هم پر امنيتي پوستو بريد کړى او تلفات يې ورته اړولي دي.
د ويلو ده، دغه عمليات هغه وخت پيل شول چې سيمه ييز خلک د وسله والو د فعاليتونو د زياتېدو اندېښنه وښوده او د نورو امنيتي پوستو د جوړولو غوښتنه يې وکړه، امنيتي چارواکي وايي چې د عملياتو له پاى ته رسولووروسته به په دې سيمه کې امنيتي پوستې زياتې کړي.
Visits: 3
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن