لښکرګاه (پژواک ٩ وږى ٩٢): د هلمند په سنګين ولسوالۍ کې پر ملکي موټر د ماين چاودنې ١٢ تنه وژلي دي.
د هلمند د والي وياند عمر ځواک د وږي په ٩مه پژواک خبري اژانس ته وويل، چې دا چاودنه پرون مازديګر د سنګين ولسوالۍ د ګرماو په سيمه کې شوې ده.
هغه زياته کړه، چاودنه د کجکي ولسوالۍ د اوسېدونکو پر يوه ټونس موټر شوې، چې د سنګين ولسوالۍ پر لور روان و.
ځواک وايي، په دې چاودنه کې د يوې ښځې په ګډون ١٢ عام وګړي وژل شوي او موټر بشپړ ويجاړ شوى دى.
د والي وياند وويل، چې دغه ماين د وسله والو طالبانو له خوا ځاى پر ځاى شوى و، خو وسله والو طالبانو تر اوسه په دې اړه څه نه دي ويلي.
د يادونې ده، په دې وروستيو کې د ماين چاودنې او ځانمرګي بريدونه ډېر شوي دي، پرون د کندوز په دشت ارچي ولسوالۍ او تر هغه مخکې په غزني ښار کې ځانمرګو بريدونو لسګونو تنو ته مرګ ژوبله واړوله.
دغه راز نن له غرمې مخکې په کندهار ښار کې هم ځانمرګي بريد تر ٣٠ پورې کسانو ته مرګ ژوبله اړولې، چې ډېرى يې عام وګړي دي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن