کندوز( پژواک، ٢٧ وږى ٩٢): د کندوز ولايت د ټاکنو خپلواک کمېسيون د سيمه ييز دفتر مشر نن سهار په يوه وسله وال بريد کې ووژل شو.
د کندوز د امنيه قوماندانۍ دامنيت امرسمونوال عبادالله تلوار پژواک خبري اژانس ته وويل، چې انجنير امان الله امان نن سهار شپږ نيمې بجې د کندوز ښار درېيمې ناحيې اړوند ازادۍ واټ کې د دوو وسله والو موټر سايکل سورو له خوا ووژل شو.
د کندوز د عامې روغتيا رييس ډاکټر سعد مختار وويل، چې په کندوز کې د ټاکنو خپلواک کمېسيون د سيمه ييز دفتر رييس له ټپي کېدو دوه ساعته وروسته د ژورو ټپونو له امله د کندوز د بې پولې ډاکټرانو په روغتون کې ساه ورکړه.
هغه زياته کړه، چې د ياد رييس پر ګېډه، ورانه او لاس پر مرميو لګېدلى و او په روغتون کې يې د عملياتېدو پر مهال ساه ورکړه.
دکندوز دامنيه قوماندانۍ دامنيت امر وايي، چې انجنير امان درې ساتونکي هم لرل؛ خو هغه له خپل ځان سره ساتونکي نه و بيولي او دخپلو هټيو دکرايې د را ټولولو لپاره ښار ته تللي و، چې تر بريد لاندې راغى.
هغه زياته کړه، چې دبريد کوونکو هويت نه دى څرګند ، خو پوليسو څلور شکمن کسان نيولي او له هغوى څخه پوښتنې پيل شوې دي، ترڅو داصلي عاملينو دنيولو لپاره لاره هواره شي.
د ټاکنو کمېسيون وياند نومحمد نور، پژواک اژانس ته وويل، چې انجنير امان د ټاکنو بهير له پيله له دې کمېسيون سره کار کاوه او په دې برخه کې د بشپړې تجربې خاوند و.
هغه د امان له کورنۍ سره د خواږۍ د څرګندولو ترڅنګ وويل، چې نوموړى له هغو کارکوونکو څخه و چې د ديموکراسۍ او ټاکنو بهير په ډګر کې يې په ځانګړې توګه کندوز ولايت کې ډېر کار او فعاليت کړى دى.
تراوسه ددغه بريد مسووليت چا پر غاړه نه دى اخيستى.
Visits: 2
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن