ګردېز (پژواک ٢٨ تله ٩٢): په خوست کې د ملي اردو چارواکي وايي، چې ځواکونو يې درې طالب ولسوالان نيولي دي.
د خوست د ولايت مقام له خوا د تلې په ٢٨مه پژواک خبري اژانس ته په يوه رالېږل شوې خبرپاڼه کې راغلي، چې دغه څرګندونې د ٢٠٣ تندر قول اردو د لومړۍ پلې لوا قوماندان بريد جنرال محمد ناصر هدايت نن د دغه ولايت په اوونيزه امنيتي غونډه کې وکړې.
جنرال هدايت ويلي، چې نيول شوي د پکتيا د زرمت، د کابل د خاکجبار او د کابل د سروبي ولسواليو لپاره د طالبانو ولسوالان دي.
د هغه په وينا، دوى هغه مهال له وسلو سره يو ځاى ونيول شول، چې د لومړۍ پلې لوا سرتېرو د پکتيا ولايت د زرمت په ولسوالۍ کې چاڼيز عمليات ترسره کول.
د ده په خبره، د ملي اردو سرتېرو د خوست ولايت په صبريو ولسوالۍ کې هم د عملياتو پر مهال ((٢٠٠)) دوه سوه کيلوګرامه چاودېدونکي توکي نيولي او له منځه يې وړي دي.
په خبرپاڼه کې راغلي، چې په دې امنيتي غونډه کې د خوست د ملي امنيت رييس جنرال محمدحسن شهيدزوى په خپل اونيز راپور کې وويل، چې په تېره اونۍ کې يې د حقاني شبکې پنځه تنه مهم وسله وال نيول شوي دي.
وسله والو طالبانو تر اوسه په دې اړه څه نه دي ويلي.
د خوست والي عبدالجبار نعيمي د ملي اردو، ملي پوليسو، ملي امنيت، سرحدي پوليسو او نورو امنيتي قواوو ستاينه وکړه، چې ورسپارل شوې دندې يې په ښه شان سره سرته رسولې او د افغانستان په دغه حساس ولايت کې يې هېچا ته د دې موقع ورنه کړه، چې د لوى اختر نېکمرغه مراسم ګډوډ کړي او خلک دې د خوشالۍ پر ځاى د وير په ټغر کښېنوي.
نعيمي دوى ته سپارښتنه وکړه، چې خوست د هېواد لپاره د يوې مهمې دروازې حيثيت لري، نو په همدې اساس امنيتي او کشفي ځواکونه بايد هره شېبه ځير او ويښ و اوسي او هېڅ وخت چا ته د دې چانس ورنه کړي، چې دغه ولايت د نا امنۍ خوا ته بوځي او خلک يې له ستونزو سره مخ شي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن