کابل (پژواک ٢٣ لړم ٩٢): د کورنيو چارو وزارت وايي، چې د تېرو ٢٤ ساعتونو پر مهال په ځينو ولايتونو کې د امنيتي ځواکونو په عملياتو کې اته وسله وال طالبان وژل شوي، خو طالبان بيا دغه ادعا ردوي.
د کورنيو چارو وزارت له لوري پژواک خبري اژانس ته په رالېږل شوې خبرپاڼه کې راغلي، چې ياد چاڼيز عمليات ملي پوليسو، ملي اردو، ملي امنيت او اېتلافي ځواکونو د لغمان، کندهار، اروزګان، لوګر، هرات، غور او هلمند ولايتونو کې ترسره کړي دي.
سرچينې زياته کړې، په دغو عملياتو کې امنيتي ځواکونو اووه نور وسله وال ژوندي نيولي او له هغوى يې يوه اندازه مهمات او چاودېدونکي توکي هم ترلاسه کړي دي.
خو وسله وال طالبان ياده خبره نه مني او وايي، چې د تېرو ٢٤ ساعتونو پر مهال په يو شمېر ولايتونو کې پر بهرنيو او کورنيو ځواکونو بريدونه کړي او ګڼو سرتېرو ته يې مرګ ژوبله اړولې ده.
د کورنيو چارو وزارت دغه راز وايي، د کابل پوليسو تېره ورځ اته تنه د انسان تښتونې، وژنو او غلا په تور نيولي دي.
د سرچينې په وينا، دغه کسان يې د کابل ښار د شپږمې، اوومې، اتمې او يوولسمې امنيتي حوزو په اړوندو سيمو کې نيولي او اوسمهال د ملي پوليسو تر پوښتنو لاندې دي.
Visits: 6
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن