کابل (پژواک ٢٣ لړم ٩٢): د هېواد د پښتو ژبې پياوړى شاعر او ليکوال استاد نصرالله حافظ د ورپېښې ناروغۍ له امله تېره شپه په کابل ښار کې وفات شو.
د نوموړي د کورنۍ غړي صديق الله بدر نن (د لړم ٢٣مه) پژواک خبري اژانس ته وويل، چې استاد حافظ ته څلور ورځې وړاندې په خپل کور کې له زينې څخه د راغورځېدو له امله مغزي خون ريزي پيدا شوې وه او له همدې کبله د کابل ښار په سردار داوود خان (څلور سوه بستريز) روغتون کې بستر شو.
ده زياته کړه، چې نوموړي تېره شپه دوه بجې د ٨٢ کلونو په عمر له دې فاني نړۍ سره مخه ښه وکړه.
د هغه په وينا، د حافظ جنازه نن له خپل کوره چې د کابل ښار په شاه شهيد سيمه کې موقعيت لري، د جلال اباد پر لور ولېږدول شوه او هلته به د امير شهيد په بڼ کې د هغه د جنازې مراسم ترسره شي.
بدر وايي، چې د مرحوم حافظ مړى به د چپرهار ولسوالۍ په حافظانو کلي کې خاورو ته وسپارل شي.
هغه زياتوي، چې استاد حافظ د ژوند، مينې او سولې شاعر و، د هغه په شعر کې مينه، عاطفه او ښکلا پرته وه.
د ده په خبره، د نوموړي په شعرونو کې د سولې او مينې پيغام پروت و او ولس يې هېوادپالنې او يووالي ته هڅاوه.
د يادولو ده، چې نصرالله حافظ د ميرزا نور اسلام زوی، په ۱۳۱۰ لمريز کال کې يې د ننګرهار ولايت د چپرهار ولسوالۍ په حافظانو کلي کې د نړى ته سترګې غړولې وې.
نوموړى د نظم او نثر په برخه کې ١٣ چاپ شوي او شاوخوا ٢٦ ناچاپ اثار لري.
Visits: 6
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن