ميمنه (پژواک ٣ ليندۍ ٩٢): په فارياب ولايت کې د جنرال دوستم په مشرۍ د ملي اسلامي جنبش د يوه قوماندان د وژل کېدو خبر ورکړل شو.
ځايي چارواکي وايي، چې دغه قوماندان سيد نجيب الله نومېده او تېر مازديګر د قيصار ولسوالۍ چهلګزي بازار ته نږدې د يوه بريدګر له خوا پر ډزو وژل شوى دى.
د قيصارولسوال عبدالجميل صديقي پژواک خبري اژانس ته وويل، چې سيد نجيب الله د ملي اسلامي جنبش يو پخوانى قوماندان او په قيصار کې د سيمه ييزو پوليسو اوسنى قوماندان و.
صديقي د دې وژنې د انګېزې په اړه وويل، چې ده شپږ کاله وړاندې د سيد قطب په نوم يو کس وواژه او بندي شو، د روان کال په لومړيو کې بېرته خوشى او د سيمه ييزو پوليسو په چوکاټ کې يې دنده ترسره کوله.
ده زياته کړه، چې دغه قوماندان د سيدقطب الدين د ورور سيد اسماعيل له خوا وژل شوى دى. بريدګر له سيمې تېښته کړې او د وسله والو طالبانو سيمې ته ورغلى دى.
د فارياب ولايتي شورا منشي او د ملي جنبش ګوند غړي سيد عبدالباقي هاشمي هم وويل، چې دغه قوماندان د سيد قطب الدين د وژنې په تور د هغه د تړلو کسانو له خوا د غچ په توګه وژل شوى دى.
تېره ورځ هم د فارياب په پښتونکوټ ولسوالۍ کې د محمد سرور کُلني په نامه د جميعت اسلامي ګوند يو پخواني قوماندان په يوه وسله وال بريد کې ووژل شو او طالبانو يې مسووليت پر غاړه واخيست.
سيمه ييز چارواکي وايي، چې دى د پياوړو او دولت پلوه قوماندانانو څخه و، چې تېر کال د طالبانو نومول شوى والي مولوي يارمحمد هم له لسګونو نورو طالبانو سره د دغه قوماندان کسانو وژلى و.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن