کابل (پژواک ٢٤ ليندۍ ٩٢): د مشرانو جرګې ځينې غړي وايي، افغان ولسمشر دې له هند څخه د پوځي مرستو د غوښتنې پر ځاى له امريکا سره امنيتي تړون لاسليک کړي ، څو افغان ځواکونه پر وسلو سمبال کړي.
دا په داسې حال کې ده، چې ولسمشر حامد کرزى تېره پنجشنبې د څلور ورځني سفر په موخه هند ته تللى دى.
د ولسمشر د وياند دفتر ويلي، چې افغانستان او هند، د افغان امنيتي ځواکونو د تجهيزاتي اړتياوو د لرې کولو په شمول د دفاعي او امنيتي همکاريو هوکړه کړې ده.
د مشرانو جرګې په نننۍ عمومي غونډه کې د دايکنډي استازي علي اکبر جمشيدي وويل، د دې پر ځاى چې ولسمشر کرزى له هند څخه د افغان ځواکونو لپاره وسلې غواړي، غوره ده د مشورتي لويې جرګې د پرېکړې پر بنسټ له امريکا سره امنيتي تړون لاسليک کړي.
هغه زياته کړه: ((د افغان ځواکونو د وسلو سمبالولو لپاره کومه وړتيا، چې امريکا او غرب هېوادونه يې لري، ګاونډي هېوادونه يې نه لري.))
ده د ملي شورا له غړو غوښتنه وکړه، چې د ولسمشر او امريکا تر منځ منځګړتوب وکړي، تر څو ولسمشر ياد امنيتي تړون لاسليک کړي.
مشورتي لويې جرګې د ليندۍ په ٣مه له امريکا سره امنيتي سند له يو لړ وړانديزونو سره تاييد کړ او له ولسمشر کرزي يې وغوښتل، چې دغه سند لاسليک کړي.
خو کرزي د جرګې په وروستۍ ورځ د دغه تړون د لاسليک لپاره د رڼو ټاکنو ترسره کېدل، د افغانانو کورونو ته د بهرنيو ځواکونو نه ننوتل او په افغانستان کې د سولې ټينګښت د شرطونو په توګه وړاندې کړل.
په ياده جرګه کې د باميانو استازي هدايت الله رهايي هم وايي، چې د هند پر ځاى بايد د افغان ځواکونو د سمبالولو په موخه مرستې له امريکا څخه وغوښتل شي.
هغه وايي، چې له امريکا سره د امنيتي تړون ځنډول هېواد له امنيتي، سوداګريزو او اقتصادي ستونزو سره مخ کوي.
هغه زياته کړه: ((کرزى چې هر څومره د دغه تړون لاسليک ځنډوي؛ همدومره طالبان او نور ترهګر خوشالېږي.))
په ياده جرګه کې د فراه استازى ګل احمد اعظمي هم ورته نظر لري او وايي، چې هند هم افغانستان ته مشوره ورکړې څو له امريکا سره امنيتي تړون لاسليک کړي.
دى هم وايي، چې د دغه تړون د لاسليک ځنډول هېواد له ګنو ستونزو سره مخ کولاى شي.
د مشرانو جرګې مشر فضل هادي مسلميار په مشخص ډول د تړون د لاسليک په اړه څه ونه ويل، خو يادونه يې وکړه چې ولسمشر بايد د مشورتې جرګې پرېکړې ته احترام وکړي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن