کابل (پژواک ٢٦ مرغومى٩٢): د ازادو رسنيو د ملاتړ اداره (نى) وايي، چې د ټاکنو په پروسه کې د رسنيزو فعاليتونو د تنظيم لايحه، سره له دې چې قانوني ستونزې لري، رسنيو ته نوې ستونزې هم زېږوي.
د ټاکنو د خپلواک کمېسيون د رسنيو کمېسيون تېره ورځ د ټاکنو په پروسه کې د رسنيزو فعاليتونو د تنظيم لايحه په يوولسو مادو کې تصويب کړه .
له ازادو رسنيو د ملاتړ ادارې (نى) اجرائيوي مشر عبدالمجيب خلوتګر د مرغومي په ٢٦مه په کابل کې د يوې خبري غونډې پر مهال وويل، چې د رسنيزو فعاليتونو د تنظيم په لايحه کې د قانوني ستونزو تر څنګ حقوقي اصلاحات هم په سمه توګه نه دي کارول شوي، چې د ټاکنيزو خپرونو په پوښښ کې رسنۍ له ګڼو ستونزو سره مخ کوي.
هغه د بېلګې په توګه وويل: ((په دې لايحه کې د تخطي پر ځاى تخلف ليکل شوى، چې له قانوني پلوه دغه کمېسيون د رسنيود تخطۍ د څېړلو واک لري، نه د تخلف.))
خلوتګر وايي، په دې لايحه کې د کانديدانو په اړه د نظرسنجي شرايط نه دي مطرح شوي، چې دغه کار د قانون جوړونې له نوي دود سره په مخالفت کې دى.
د هغه په وينا، د دې لايحې په پنځمه ماده کې ټينګار شوى، چې د ولسمشرۍ او ولايتي شوراګانو کانديدان نه شي کولاى د راډيو او تلويزيون د کومې خپرونې د مجري په توګه دنده ترسره کړي.
په ياده ماده کې راغلي: ((د رسنيو خاوندان، ژورنالېستان، متصديان او د راډيو او تلويزيوني خپرونو چلوونکي، چې د ولسمشرۍ او ولايتي شوراګانو کانديدان وي، د ټاکنيزو سياليو په ټاکل شوې موده کې نه شي کولاى د خپرونو د چلوونکو او يا نطاق په توګه دنده ترسره کړي.))
خو خلوتګر وايي، چې دغه ماده د کار د قانون له ٢٥مې مادې سره په ټکر کې ده.
د ده د معلوماتو له مخې، په ياده ماده کې يواځې دولتي کار کوونکي مکلف ګڼل شوي څو د کانديداتورۍ پر مهال له خپلو دندو استعفاوې وکړي.
هغه زياته کړه: ((کار کول د ژورنالېستان مسلم حق دى، دا حق بايد ترې وانه خيستل شي.))
د خلوتګر په وينا، په دې لايحه کې ټينګار شوى، چې رسنۍ بايد د هرې مياشتې په وروستيو کې د خپلو هغو مالي حسابونو په اړه د رسنيو کمېسيون ته معلومات ورکړي، چې د ولسمشرۍ او ولايتي شوراګانو د کانديدانو له تبليغاتو يې ترلاسه کوي.
خو خلوتګر وايي، چې رسنۍ د هر کال په پاى خپل مالي راپور د رسنيو عالي شورا او ماليې وزارت ته وړاندې کوي نو اړينه نه ده چې د رسنيو کمېسيون ته هم د خپلو مالي حسابونو په اړه معلومات ورکړي.
خلوتګر د پژواک خبري اژانس د يوې پوښتنې په ځواب کې وويل: ((موږ تر پرونه پورې د رسنيوکمېسيون ته ويل، چې دغه لايحه له موږ سره شريکه کړي او وروسته له هغه يې خپره کړي ، خو هغوى هېڅ اعتنا ونه کړه او دا چې دا لايحه حقوقي، قانوني او تخنيکي ستونزې لري، د کمېسيون غړو يا دغه کار د خپلو واکونو د لوړولو لپاره قصداً کړى او يا د کمېسيون په غړو کې دا وړتيا نه وه، چې له ستونزو پرته لايحه جوړه کړي.))
خو د ټاکنو د خپلواک کمېسيون د رسنيو د کمېسيون مشره فريده نېکزاد وايي، چې دغه لايحه د رسنيو له وړانديزونو سره سم او د ټاکنو قانون د ٥٠مې او ٦٠مې مادو پر اساس جوړه شوې او قانوني ستونزې نه لري.
هغې پژواک اژانس ته وويل، چې ياده لايحه له رسنيو سره مرسته کوي څو په ښه توګه د ټاکنو پروسه تر پوښښ لاندې راولي او که چېرې له دې لايحې کانديدان او يا هم رسنۍ سرغړونه وکړي، نو د ګواښ تر څنګ به له نغدي جريمې سره هم مخ شي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن