کابل (پژواک ٣٠ مرغومى ٩٢): په ولسي جرګه کې د “ملي يووالي” په نوم پارلماني ګروپ جوړ شو، چې ورسره په دې جرګه کې د پارلماني ګروپونو شمېر نهو ته ورسېد.
د دغه پارلماني ګروپ غړي او په دې جرګه کې د فارياب استازي محمد هاشم نن د جرګې په عمومي غونډه کې وويل: “هېڅوک په يواځې ځان نه شي کولاى چې د هېواد د ملي ګټو لپاره کار وکړي؛ نو موږ هم د هېواد د ملي ګټو په موخه دغه پارلماني ګروپ جوړ کړ.
ده وويل، چې د ولسي جرګې او حکومت تر منځ د اړيکو ټينګښت، د خلکو له حقونو کلکه دفاع، د سولې د راوستو لپاره هلې ځلې، په هېواد کې د يووالي ټينګښت او د عدالت تامين د دغه پارلماني ګروپ اساسي موخې دي.
د ده د معلوماتو له مخې، په ولسي جرګه کې د هرات استازى غلام فاروق نظري د دغه پارلماني ګروپ مشر او په دې جرګه کې د کابل استازى فرهاد صديقي يې مرستيال دى او د نيمروز استازې فرشته اميني د دغه ګروپ منشي ده.
دى وايي، چې دغه پارلماني ګروپ ١٢ غړي لري.
د يادونې ده، چې تر دې مخکې په ولسي جرګه کې د يووالي، سبا، ملي،سولې کاروان، صداى عدالت، رسالت، سعادت او اعتماد په نومونو اته نور پارلماني ګروپونه هم جوړ شوي دي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن