کابل-تالقان (پژواک ٢٨ سلواغه ٩٢): په ولسي جرګه کې د غور ولايت پر استازي کرام الدين رضازاده باندې د يوه بريد مخنيوى وشو او په تخار ولايت کې د ملي امنيت يو کار کوونکى ووژل شو.
د ملي امنيت لوى رياست د مطبوعاتي دفتر له لوري پژواک خبري اژانس ته په رالېږل شوې خبرپاڼه کې ويل شوي، چې د ولسي جرګې نوموړى وکيل د ژمنيو رخصتيو د تېرولو په موخه، له خپلو موکلينو سره د ليدلو لپاره د غور مرکز چغچران ښار ته تللى و او وسله والو مخالفينو هوډ درلود چې نوموړي ته د يوه ريموټ کنټرول ماين په وسيله چاودنه ورکړي.
خو سرچينې ويلي، چې د ملي امنيت لوى رياست موظفينو د محب الله په نوم د دغه بريد پلانوونکى، چې د چغچران ښار اصلي اوسېدونکى دى، خپلې موخې ته تر رسېدلو وړاندې له يوه کړۍ ماين سره يو ځاى نيولى دى.
د سرچينې په وينا، کرام الدين رضازاده د غور له قومي مشرانو حاجي عبدالرحمن، رضا او ملا محمود سره يو ځاى پر لارې و، چې د ماين د کشف کېدو پر مهال پر دوى باندې د بريد مخه ونيول شوه.
د ملي امنيت لوى رياست ويلي، چې نيول شوي کس د خپلو لومړنيو څېړنو پر مهال پر خپل جرم اعتراف کړى او قضيه د لا ډېرو معلوماتو په موخه تر څېړنو لاندې ده.
بلخوا په تخار ولايت کې د ملي امنيت رياست يو کارکوونکى وژل شوى دى.
د تخار امنيه قوماندانۍ د مطبوعاتو مسوول عبدالخليل اسير پژواک ته وويل، ياد کارکوونکى شيرين نومېده او نن سهار د تخار مرکز تالقانو ښار په لومړۍ ناحيه کې وژل شوى دى.
اسير زياته کړه، چې نوموړى د قدير په نوم له يوه ملګري سره حمام ته په لاره و، چې په لاره کې يې لفظي شخړه کړې او قدير د ده کلاشينکوف اخيستى او په ډزو سره يې وژلى دى.
د تخار امنيه قوماندانۍ د مطبوعاتو مسوول زياته کړه، چې پر نوموړي بريد کوونکى يو کوڅه ډبى دى، چې د پوليسو له لوري نيول شوې او د ياد کس د وژنې په اړه ترې څېړنې روانې دي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن