غزني (پژواک ٢٦ کب ٩٢): د غزني چارواکي وايي، چې په دغه ولايت کې چاودنو درې ماين خښوونکي وژلي او يو ملګي وګړى يې ټپي کړى دى.
په غزني کې د ٢٠٣ تندر قول اردو د درېيمې لوا وياند نظيف الله سلطاني د کب په ٢٦مه پژواک خبري اژانس ته وويل، چې نن سهار د دغه ولايت په مُقر ولسوالۍ کې درې ماين خښوونکي هغه مهال د خپل ماين په چاودنه کې ووژل شول، چې پر لويه لاره يې ماين خښاوه.
سلطاني وايي، دغه ماين د يادې ولسوالۍ د ګداخېلو په لويه لاره کې، چې د امنيتي ځواکونو تګ راتګ پرې ډېر دى، خښېده.
وسله والو طالبانو تر اوسه په دې اړه څه نه دي ويلي، خو ادعا يې کړې، چې د غزني ښار اړوند د جباروالو په سيمه کې يې د يوې چاودنې په ترڅ کې درې پوليس وژلي دي.
د غزني ولايتي چارواکو د وسله والو طالبانو دغه ادعا رد کړې ده.
بلخوا نن (دوشنبې) غرمه مهال د دغه ولايت په مرکز کې د يوې چاودنې له امله يو ملګي وګړى ټپي شو.
د والي وياند شفيق الله ننګ پژواک ته وويل، چې دغه پېښه د ښار په يوه سيمه کې د ځاى پر ځاى شوو چاودېدونکو توکو د چاودنې له امله رامنځته شوې ده.
ننګ وايي، دغه توکي په ښار کې تر يو پولګوټي لاندې ځاى پر ځاى شوي و.
د دې چاودنې مسووليت تر اوسه کومې ډلې پر غاړه نه دى اخيستى.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن