خوست (پژواک ٢٧ کب ٩٢): د خوست والي د دغه ولايت پر امنيتي ادارو غږ وکړ، چې د خوست د ځنګلونو وهلو مخه دې ونيسي.
نعيمي دغه څرګندونې د کب په ٢٧مه د (رنګين جشن) په نوم د نوو نيالګيو د اېښودو د کمپاين په موخه جوړه شوې غونډې کې وکړې.
نعيمي وويل، سږ کال په دغه ولايت کې په سوونو زره نوي نيالګي کېنول شوي، چې ٦٠ زره يې د دغه ولايت د المپيک ادارې له لوري کېنول کېږي.
والي وايي: ((د ځنګلونو وهل ستر خيانت او د ملي طبيعي شتمنۍ تالان دى، بايد د هغو کسانو مخه ونيول شي، چې په ځينو سيمو کې ځنګلونه وهي او له دې لارې حرامه ګټه ترلاسه کوي.))
د ولايتي شورا رييس سيد کريم خاکسار د رنګين جشن په مراسمو کې د خپلې وينا پر مهال د نيالګيو کېنولو کمپاين د خوست زرغونتيا او ښايست لپاره خورا مهم وباله، له خلکو يې وغوښتل، چې د نيالګيو په اېښودو سره خپلې سيمې او چاپېريال ته ښکلا ورکړي.
سيد کريم خاکسار وويل: ((ولس هم بايد په چاپېريال ساتنه کې برخه واخلي او هغه نيالګيو ساتنه او پالنه وکړي، چې تر دې پخوا اېښودل شوي او يا اوس کېنول کېږي.))
د علماوو شورا رييس مولوي شاه محمد وويل، نيالګي د چاپېريال د ککړتيا مخه نيسي او بايد په دې اړه پاملرنه زياته شي.
د المپيک امر عزيز ملنګ په خپلو خبرو کې وويل، چې د خوست ولايت ټول لوبغاړي به په دغه کمپاين کې برخه واخلي او ٦٠زره نيالګي به کېنوي.
د رنګين جشن په وروستيو کې د خوست والي، چې ګڼ شمېر مشرانو او مسوولينو يې ملتيا کوله په اداري کمپليکس کې د نيالګيو اېښودو کمپاين د يوه نيالګي په کېنولو سره پيل کړ.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن