ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

پژواک ځينو نورو ولايتونو کې هم د ولسي ژورنالېزم ورکشاپونه جوړ کړل

پژواک ځينو نورو ولايتونو کې هم د ولسي ژورنالېزم ورکشاپونه جوړ کړل

author avatar
1 Apr 2014 - 16:00
پژواک ځينو نورو ولايتونو کې هم د ولسي ژورنالېزم ورکشاپونه جوړ کړل
author avatar
1 Apr 2014 - 16:00

کابل (پژواک ١٢ ورى ٩٣): د پژواک خبري اژانس له خوا له ټاکنو د څار په موخه په ځينو نورو ولايتونو کې هم د ولسي ژورنالېزم په اړه ورکشاپونه جوړ شول او له ګډونوالو يې وغوښتل شول، چې د ټاکنو پر مهال د درغليو او سرغړونو په رابرسېره کولو همکاري وکړي.

دغه ورکشاپونه، چې په کې لسګونو کسانو برخه اخيستې وه، په ولايتونو کې د پژواک خبري اژانس په سيمه ييز دفترونو کې جوړ شوي وو.

د کندهار ولايت په ورکشاپ کې د ښار، ارغنداب، ډنډ، دامان، سپين بولدک او د نورو سيمو ٣٥ ځوانانو ګډون کړى و، چې له ډلې يې ١٠ تنه ښځينه وې.

د دغه ورکشاپ له لارې ولسي ژورنالېستانو ته وښودل شوه، چې څنګه د ټاکنو په ورځ د درغلۍ او سرغړونو مخه ونيسي او په اړه يې له پژواک خبري اژانس سره معلومات شريک کړي.

په کندهار کې د پژواک ځايي خبريال بشير احمد نادم ګډونوالو ته وويل، چې دغه ګام په هېواد کې د رڼو ټاکنو د ترسره کېدو په موخه اخيستل کېږي او هر افغان بايد د خپل ملي رسالت له مخې په دې ملي پروسه کې هر ډول درغلۍ او تخطۍ رابرسېره کړي.

د ولسي ژورنالېستانو له ډلې فضل احمد انيس د پژواک اژانس دغه اقدام وستايه او ويې ويل، دا لومړنۍ خپلواکه رسنۍ ده، چې د هېواد له ګوټ ګوټ څخه د ورځنيو تودو پېښو په اړه د خبرونو، راپورونو او معلوماتو د خپرولو تر څنګ اوس د ولسي ژورنالېستانو پر مټ پر ټاکنو د څار لړۍ پيلوي.

هغه زياته کړه، کېداى شي بېلابېل ارګانونه له ټاکنو څارنه وکړي، خو په دې برخه کې به د پژواک د دغه اقدام اغېزمنتيا ځکه زياته وي، چې په دې برخه کې د درغليو او سرغړونو په اړه معلومات نه يوازې د خپلې رسنۍ، بلکې د نورو ټولنيزو شبکو له لارې له ټولې نړۍ سره شريکوي.

د مرينا په نوم د ورکشاپ يوې برخه والې هم وويل، چې د خپل وس مطابق به د ټاکنو په بهير کې د درغليو او سرغړونو مخنيوى کوي او معلومات به ترې ورکوي.

هغې له پژواک اژانس څخه مننه وکړه، چې د رڼو ټاکنو د ترسره کېدو په موخه يې د درغليو او سرغړونو په اړه د معلوماتو ورکولو تر ټولو اغېزمنه وسيله او زمينه برابره کړې ده.

د غه راز همدا ډول ورکشاپونه په پکتيا، بلخ، ننګرهار، غزني، باميان او هرات ولايتونو کې هم جوړ شوي چې په کې لسګونو کسانو برخه اخيستې وه.

د يادونې ده، پژواک خبري اژانس (Pajhwok Afghan News) د ١٣٩٣ لمريز کال د ولسمشرۍ او ولايتي شوراګانو په ټاکنو کې د خلکو د ګډون د کچې لوړولو په موخه د افغانانو د رايې په نوم (Afghans Vote) يوه خپلواکه، ازاده او بې پلوه ټولنيزه شبکه هم جوړه کړې ده.

په دې شبکه کې به ټول هېوادوال وکولاى شي، چې د ټاکنو په اړه خپل نظرونه، د سترګو ليدلى حال، راپورونه، مطالب، عکسونه او ويډيوګانې خپرې او وړاندې کړي.

پژواک د افغانانو رايې (www.afghansvote.af) د ټولنيزې شبکې په جوړولو کې له ټولنيزو رسنيو او معلوماتي ټکنالوجۍ څخه په ګټې اخيستو غواړي، خلکو ته په دې برخه کې په سمه توګه معلوماتو ته د لاسرسي او خپرولو په اړه ونډه ورکړي، چې موخه يې د ټاکنو په پروسه کې د خلکو ډېره ونډه اخيستل، د هغوى د اواز پورته کول، له نورو کسانو سره د سترګو د ليدلي حال شريکول او په ټاکنو کې د زياتو خلکو ونډه اخيستل دي.

پژواک غواړي، چې د دې شبکې له لارې په ځانګړي ډول د هېواد په لرې پرتو سيمو کې ټاکنيزې سرغړونې او درغلۍ، ثبت او خلکو ته وړاندې کړي او دغه شبکه د ټاکنو د څارونکو او ليدونکو تر منځ د همغږۍ لپاره يو پياوړى ميکانيزم رامنځته کړي.

Visits: 0

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.