کابل (پژواک ٢٣ ورى ٩٣): د ولسي جرګې يو شمېر غړي، د رڼو ټاکنو پايلو ته د شک په سترګه ګوري او په ټاکنو کې د پايلو او درغليو په اړه وړاندوينې د اندېښنې وړ بولي.
خو د ټاکنيزو کمېسيونونو چارواکي وايي، چې د ټاکنو پايلې به په روڼ ډول اعلان شي او کوم کانديد به د درغلۍ په تر سره کولو سره ولسمشرۍ ماڼۍ ته لاره پيدا نکړي.
د ولسمشرۍ او ولايتي شوراګانو ټاکنې د وري مياشتې په ١٦ مه تر سره شوې او ټاکل شوې، چې قسمي پايلې يې نن د دغه کمېسيون له لوري اعلان شوې واى ، خو سبا ته وځنډول شوې.
د ټاکنو کمېسيونونو مشرانو په ټاکنو کې له پراخه درغليو خبر ورکړى او ويلي يې دي، چې ٣٠٠٠ ثبت شويو شکايتونو له مخې به د رايې ورکولو د يو شمېر مرکزونو صندوقونه قرنطين کړي او ځينې به يې باطله اعلان کړي.
په ياده جرګه کې د هرات استازي منورشاه بهادري وويل: ” حکومت او د ټاکنو کمېسيون په خپلې برابرې شوې طرحې سره د ځانګړي کانديد د برياليتوب هڅې کوي.”
بهادري له زياتو جزيياتو ورکولو پرته وويل، يو شمېر کسان د ولسمشرۍ د يوه ځانګړي کانديد د برياليتوب لپاره هلې ځلې کوي.
هغه زياته کړه: ” که د ټاکنو پايلې چېرې بل لوري ته کش کړى شوې ، نو د خلکو استازي به چوپ پاتې نه شي.”
نوموړي ګواښ وکړ: ” موږ ته هر ډول طرحه شوې درغلۍ د منلو وړ نه دي او که چېرې د خلکو له رايو ناوړه ګټه پورته شي، نو موږ به د خلکو له حق څخه دفاع وکړو.”
د هغه په وينا، په ټاکنو کې په درغلۍ او تنبلۍ تورن شوي کسان بايد د ټاکنو له پايلو اعلانولو وړاندې، څارنوالۍ ته ور وپېژندل شي.
همدارنګه نوموړي، په ټاکنو کې د درغليو، سرغړونو او پايلو په اړه وړاندوينه د اندېښنې وړ وبلله او ويې ويل، چې د چارواکو بېلابېل ډول څرګندونې به د ټاکنو مشروعيت تر پوښتنې لاندې راولي.
په ياده جرګه کې د فراه د خلکو استازي سميع الله صميم هم د ټاکنيزو شکايتونو له کمېسيون څخه وغوښتل، چې په ټاکنو کې د درغلۍ او پايلو په اړه له وړاندوينې ډډه وکړي، ځکه د نوموړي په وينا، دا کار د افغانانو او د هېواد په ګټه نه دى.
د ولسي جرګې مشر عبدالرووف ابراهيمي وويل، چې په ټاکنو کې د درغلۍ په اړه غيرمسوولانه او له وخت وړاندې څرګندونې، د ټاکنو مشروعيت تر پوښتنې لاندې راوستى شي.
هغه د ټاکنو له کمېسيونونو وغوښتل، چې خپل کارونه په خپلواکه توګه پر مخ يوسي او خلکو ته د ټاکنو په اړه روڼ ځواب ووايي، ځکه په دغه پروسه کې هر ډول غيرقانوني عمل هېواد د بهران پر لوري بېولى شي.
ابراهيمي له حکومت او د ولسمشرۍ ټاکنو له کانديدانو وغوښتل، چې د ټاکنو په چارو کې بايد کومه لاسوهنه ونه کړي او ټاکنې دې د رسمي پايلو اعلان ته پرېږدي.
د هغه په وينا، که چېرې د ټاکنو کمېسيونونه د کوم ځانګړي کانديد په ګټه او د هغه د برياليتوب لپاره کار وکړي، نو ولسي جرګه به يې پر وړاندې ودريږي.
خو د ټاکنو خپلواک کمېسيون او ټاکنيزو شکايتونو کمېسيون چارواکي وايي، چې د ټاکنو پايلې به په روڼ ډول تر سره شي او هيڅکله به هم د کوم ځانګړي کانديد په ګټه کار تر سره نه شي.
د ټاکنيزو شکايتونو مشر عبدالستار سعادت پژواک خبري اژانس ته وويل: ” موږ پرېکړه کړې، چې اصلي رايې د درغلۍ له رايو جلا کړو.”
هغه وويل، چې ياد کمېسيون د ټاکنو په اړه کومه وړاندوينه نه ده کړې، خو په دغه کمېسيون کې د درغليو او سرغړونو په اړه شکايتونه ثبت شوي او په عملي توګه پرې کار روان دى.
سعادت زياته کړه، چې خلک د دې کمېسيون په اړه بايد د شکايتونو له څېړنو او پايلو وروسته قضاوت وکړي.
د ټاکنو خپلواک کمېسيون د دارالانشا مشر ضياءالحق امرخېل، له کوم ځانګړي کانديد څخه د ياد کمېسيون پلوي رد کړه.
نوموړي زياته کړه، کمېسيون به هڅه وکړي، چې حق خپل حقدار ته وسپاري او د درغلۍ او اصلي رايو تر منځ تفکيک وکړي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن