ميدانښار (پژواک ۴ غويى ۹۳): په ميدان وردګو ولايت کې د ۹ مرکزونو رايې قرنطين او د ۳۴ صندوقونو رايې بيا وشمېرل شوې.
په ميدان وردګو ولايت کې د ټاکنو خپلواک کمېسيون رييس انجنير نورالله پيغام د غويي په ۴مه پژواک خبري اژانس ته وويل، چې ياد مرکزونه د ټاکنو د شکايتونو خپلواک کمېسيون په غوښتنه قرنطين شوې او دوى په مستقيم ډول د هېڅ مرکز او يا کوم صندوق رايې نه دي قرنطين کړې.
د هغه په وينا، امکان لري د قرنطين شوو صندوقونو رايې به وروسته له هغه باطلې او يا هم پاکې اعلان کړي، چې د دوى څېړنې په بشپړ ډول ترسره شي .
خو د پيغام په وينا، تر دې مهاله په دغه ولايت کې يوه رايه هم د دوى له لوري باطله نه ده اعلان شوې.
په ورته وخت کې په ميدان وردګو کې د ټاکنو د شکايتونو خپلواک کمېسيون د دارالانشاء امر حيات الله حامد د غويي په ۴مه پژواک خبري اژانس ته وويل، چې د دوى له خوا د ۹ مرکزونو قرنطين رايې د مرکزي بهسود د ۷ او د سيداباد ولسوالۍ د دوو مرکزونو اړوند دي.
هغه وايي، چې د ۱۶۲ صندوقونو رايې پلټل شوې او همدا راز د شپږ دېرشو صندقونو رايې يې د بيا ځل لپاره شمېرلې دي .
د حامد په وينا، دوى ته په څلورو ګټګوريو کې ۳۹ شکايتونه ورغلي، چې شپږ يې مرکز ته استولي او ۳۳ نور له دوى سره د څېړلو په موخه پاتې دي .
دغه کمېسيونونه وايي، چې د دغو صندوقونو رايې په ټاکلې موده کې قرنطين شوې دي.
دا په داسې حال کې ده، چې په ميدان وردګو ولايت کې د ولايتي شورا ځينو کانديدانو پژواک ته په دغه ولايت کې په ټاکنو کې د پراخو درغليو ادعا کړې وه.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن