درې طالبان ووژل شول او ١٨ نور نيول شوي

پل علم(پژواک،٨ غويى٩٣):د لوګرچارواکي وايي، چې ديوې نښتې په ترڅ کې يې ٣ طالبان وژلي او د يوه قوماندان په ګډون يې ١٨ نور نيولي دي.

ددغه ولايت د امنيه قوماندانۍ مرستيال سمونوال عبدالولي طوفان ترکي  پژواک خبري اژانس ته وويل، چې نن شاوخوا ١٠بجې د مرکز اړوند په کجې سيمه کې د پوليسو او طالبانو ترمنځ نښته رامنځته شوه.

ترکي وايي: (( د ملي او سيمه ييزو پوليسو موټر د ګزمۍ پر مهال و، چې طالبانو پرې ډزې وکړې او وروسته نښته رامنځ ته شوه،په دې نښته کې ٣ وسله وال ووژل شول او د طالب قوماندان ملامتين په ګډون ١٨ نور ژوندي ونيول شول.))

ترکى زياتوي ، له نيول شويو طالبانو پوښتنې روانې دي.

دى وايي: (( جګړې درې ساعته دوام وکړ، د سيمې خلکو او پوليسو ته په کې مرګ ژوبله نه ده اوښتې.))

د يادې سيمي اوسېدونکي ګلاب جان  پژواک ته وويل، چې په کلي کې يې د افغان ځواکونو او وسله والو تر منځ سخته نښته وشوه، چې له امله يې خلک په کورنو کې بند پاتې وو.

دده په وينا، جګړې څو ساعته دوام درلود، خو ولسي خلکو ته په کې زيان نه دى اوښتى.

طالبانو تراوسه په دې تړاو څه نه دي ويلي.

Visits: 0