د دغو طالب چارواکو د خوشي کېدو راپور د غبرګولي په لسمه خپور شو.
د راپورونو له مخې، دغه تبادله د قطر په منځګړیتوب ترسره شوې او خوشي شوي طالبان قطر ته رسېدلي دي.
د خوشي شوو طالب چارواکو لنډه پېژندنه:
ملا خیرالله خیرخوا
ملا خیرالله خیرخوا په ۱۹۶۷زېږدیز کال په کندهار کې زېږدلی او د طالبانو د واکمنۍ پر مهال د کورنیو چارو د وزير، د هېواد د ختیځ زون عمومي رییس او د بلخ او هرات د والي په توګه يې دندې ترسره کړې دي.
هغه په کندهار کې د امریکایانو له خوا ونیول شو او د ۲۰۰۲ زېږدیز کال د مې میاشتي په دويمه د ګوانتانامو زندان ته لېږدول شوى و.
ملا محمد فاضل
ملا محمد فاضل شاوخوا ۴۶ کلن دی او د اروزګان په ولایت کې زېږېدلی دی.
ملا فاضل د طالبانو د واکمنۍ پر مهال د لوی درستیز، د دفاع وزارت د مرستیال او په لوېدیځ کې د جګړې عمومي قوماندان و.
هغه په ٢٠٠١ زېږدیز کال کې په کندوز کې ونیول شو او د ۲۰۰۲ کال د جنورۍ په ۱۱مه د ګوانتانامو زندان ته واستول شو.
ملا نورالله نوري
ملا نورالله نوري ۴۷کلن دی او په زابل کې زېږېدلی دى. هغه د طالبانو د واکمنۍ پرمهال د لغمان، بغلان او بیا د بلخ د والي توګه دندې ترسره کړې دي.
نوري، په ۲۰۰۱ زېږدیز کال کې ونیول شو او د ۲۰۰۲ کال د جنورۍ په ۱۱مه د ګوانتانامو زندان ته ولیږدول شو.
ملا عبدالحق وثیق
ملا عبدالحق وثیق ۴۵ کلن دی او په غزني کې زېږېدلی دی.
دى د طالبانو د واکمنۍ پر مهال د استخباراتو د ریاست مرستیال و او د ۲۰۰۲ کال د جنورۍ په ۱۱مه د ګوانتانامو زندان ته لېږدول شوى و.
ملا محمد نبي عمري
ملا محمد نبي عمري په ۱۹۶۸زیږدیز کال کې په خوست کې زیږیدلی او د طالبانو د واکمنۍ پر مهال لوړپوړى پوځي چارواکى و.
دی د ۲۰۰۲ کال د اکتوبر په دويمه د ګوانتانامو زندان ته لیږدول شوی و.
د طالبانو مشر ملا محمدعمر د يادو کسانو خوشي کېدل “ستره فتحه” بللې او د يادو کسانو د خوشي کېدو له امله يې ټول افغان ولس او د يادو کسانو کورنيو ته مبارکي ويلې ده.
ده د ټولو هغو کسانو په تېره بيا د قطر هېواد او د هغه له امیر شیخ تمیم بن حمد بن خلیفه آل ثاني څخه مننه کړې چې د نوموړو کسانو په را خلاصولو کې یې هلې ځلې کړې دي.
Visits: 4
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن