کابل (پژواک ١٨ غبرګولى ٩٣): د افغانستان خلکو د اسلامي حرکت مشر او پخواني جهادي قوماندان سيد حسين انوري ته يوې نږدې سرچينې ويلي، چى نوموړى د وسله والو مخالفينو له کمين او ځانمرګي بريد څخه روغ وتلى دى.
د دغه ګوند د فرهنګي چارو مشر سيد جعفر عادلي حسيني، پژواک خبري اژانس ته ويلي چې دغه پېښه د يکشنبې (د غبرګولي ١٨مه) د مازيګر په شاوخوا پنځو بجو د پروان ولايت په سياه ګرد ولسوالۍ کې رامنځته شوې ده.
هغه وويل: “زه هم د ښاغلي انوري د موټرو له کاروان سره له سياګرد ولسوالۍ راګرځېدو، چې ناڅاپه يوه ځانمرګي بريدګر د سياګرد ولسوالۍ له رنګاپول څخه د تېرېدو پر مهال له خپل موټرسايکل سره د انوري موټر تر شا په بل موټر پورې ځان ونښلاوه، چې له هغه وروسته سخته نښته پيل شوه.”
حسيني زياته کړه: “حتى د شاوخوا کورونو له لوري هم پر موږ ډزې کېدې، چې ورته مهال د ولسوالۍ پوليس را ورسېدل او نښته له ٤٠ دقيقو وروسته پاى ته ورسېده.”
د ياد ګوند د فرهنګي چارو د مشر په وينا، په دې پېښه کې سيدحسين انوري ته کوم زيان نه دى اوښتى، خو د سيمې يوه اوسېدونکې مېرمن د ځانمرګي بريد له امله ژوند له لاسه ورکړى او د انوري درې ساتونکي هم برسېرن ټپيان شوي دي.
د عادلي د معلوماتو له مخې، انوري او له هغه سره مل پلاوى د ټاکنيزو مبارزو لپاره يو شمېر مرکزي سيمو ته تللى و او تېره جمعه هم ميدان ښار ته په نږدې سيمه کې پرې د سړک غاړې ماين چاودېدلى و، خو نوموړي ته په کې کوم زيان نه و اوښتى.
سيدحسين انوري، په لومړي پړاو ټاکنو کې د عبدالرحيم وردګ دويم مرستيال و، خو رحيم وردګ د لومړي پړاو ټاکنو له تر سره کېدو وړاندې له خپلې نوماندۍ تېر شو او انوري هم د اشرف غني په مشرۍ له تحول او دوام ټيم څخه ملاتړ وکړ.
د سياګرد امنيه قوماندان سمونوال يارمحمد هم دغه پېښه منلې، خو وايي چې چاودنه د سړک غاړې ماين له امله رامنځته شوې، چې په پاى کې يې يوه مېرمن وژل شوې ده.
هغه وويل، چې په دې اړه به له پلټنو وروسته معلومات وړاندې شي.
د دغه بريد مسووليت تر دې دمه چا پر غاړه نه دى اخيستى.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن