کابل (پژواک ٢٦ غبرګولى ٩٣): “د افغانستان ټاکنو د څار ټولنې” سرغړونې او درغلۍ چې د صندوقونو ډکول، د ټاکنو په ورځ په دغه لړۍ کې د چارواکو لاسوهنه، د ښځو پر ځاى د نارينه وو له لوري رايه ورکول او تر خپل عمر کم کسانو له لوري رايه ورکول په کې شامل دي، ثبت کړي او هغو ته يې د لاسرسي غوښتنه کړې ده.
د دغه بنسټ له لوري په خپاره شوي راپور کې راغلي، چې د دوى ١٦٠٠ څارونکو د هېواد په ١٦ ولايتونو کې د ټاکنو له درغليو او سرغړونو څار کړى دى.
په راپور کې د ټاکنو عمومي وضعيت ښه ښودل شوى، خو د تېر ځلي ټاکنو په پرتله په دويم پړاو ټاکنو کې د خلکو کم ګډون، درغلۍ او ستونزې د اندېښنې وړ بلل شوې دي.
د ا فغانستان ټاکنو د څار ټولنې (EWA) مشر جانداد سپين غر، کابل کې نن په يوه خبري ناسته کې وويل، چې د تېر ځلي ټاکنو تجربو څخه په ګټه بيا هم د غبرګولي مياشتې د ٢٤مې نېټې په ټاکنو کې د دوى د څارونکو له لوري سرغړونې او درغلۍ ثبت شوي، چې د شکايتونو کميسيون بايد ورته لاسرسى وکړي.
د دغه بنسټ وياند پاينده محمد حکمت ساپي وويل، د دوى د څارونکو راپور څرګندوي چې ٢٨٦ محلونه له خپل ټاکل شوي وخت وروسته پرانيستل شوي او ١١٦ موارد د ښځينه وو په مرکزونو کې د ښځو کمښت او ٦٦ نور موارده د راى پاڼو د کمښت په اړه دي.
نوموړي، د ښځو پر ځاى د نارينه وو له لوري د رايې کارونه او د رايې ورکونې مرکزونو سره نږدې د ولسمشرۍ نوماندانو له لوري کمپاين کول، نورې سرغړونې په ګوته کړلې.
د يادې ټولنې د څېړنې او راپور مسوول اسدالله فرزان وويل، چې د ټاکنو په ورځ ٤٦١ موارده د کم عمر لرونکو، ١٥٨ موارده د ښځو پر ځاى د نارينه وو له لوري رايه ورکول، ٨٠ موارده د رايې ورکونې پر مهال کمپاين کول، ٢١ موارده د صندوقونو د ډکېدو او پاتې ١٨ موارده يې د ټاکنو په پروسه کې د چارواکو له لوري لاسوهنه ثبت شوې ده.
د دې بنسټ مشر سپين غر وويل، کميسيونونه د قانون له مخې بايد د قرنطين شويو صندوقونو د څېړنو پر مهال ډاګيزې ناستې تر سره کړي او څارونکو، مشاهدينو او رسنيو ته اجازه ورکړي، چې له دغې پروسې ليدنه وکړي، ترڅو پر دې بهير د نوماندانو او خلکو باور ډېر شي.
هغه زياته کړه: “موږ د ولسمشرۍ له دواړو نوماندانو غواړو، چې له وړاندوينو ډډه وکړي او د خلکو په ذهنونو کې منفي ذهنيت جوړ نه کړي.”
د افغانستان د ټاکنو د څار ټولنې مشر، له نوماندانو او د هغوى له پلويانو هم وغوښتل، چې د ټاکنو کميسيون پايلو ته انتظار وباسي او له ټاکنيزو کميسيونونو سره د کره معلوماتو په چمتو کولو کې مرسته وکړي.
د افغانستان د مدني ټولنې مجتمع (مجما) هم د وسله والو مخالفينو د ګواښونو او ناامنيو تر څنګ په دويم پړاو ټاکنو کې د خلکو پراخ ګډون، دغې ملي پروسې ته د مشروعيت ور بخښلو په معا بللى دى.
د مجما په باور، په دغو حساسو شرايطو کې له ټاکنو پرته بله لاره چاره غور کول، د راتلونکي نظام مشروعيت نه شي ټينګولى.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن