جلال اباد (پژواک، ١٤ مرغومى ٩٣): په لغمان ولايت کې د ۴۶ ميليونو افغانيو په لګښت د يوه سړک جوړولو چارې بشپړې او ګټې اخيستنې ته وسپارل شو.
د لغمان د والي وياند سرحدي ځواک د مرغومي په ١٤مه، پژوا ک خبري اژانس ته وويل چې د مهترلام ښار دننه له محمدرحيم چوک څخه تر اليشنګ اډې پورې سړک قير او نن ګټې اخيستنې ته وسپارل شو.
هغه زياته کړه، چې د دې سړک د جوړېدو چارې د اتو مياشتو په موده کې سرته ورسېدې او نن يې د پرانيستې په مراسمو کې د لغمان سرپرست والي ، ښاروال او نورو چارواکو ګډون درلود.
ځواک وايي، دغه سړک ۱۶۰۰ متره اوږدوالی او د ۱۳ متره قير په ګډون له پليو لارو سره ټول ۲۱ متره سور لري.
د نوموړي په وينا، پر دې سړک ٤٦ ميليونه افغانۍ لګښت راغلى، چې د ولايت د ښاروالۍ له خوا ورکړل شوى دى.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن