کلات ( پژواک، ٢٠ کب ٩٣ ) : د زابل په شاجوى ولسوالۍ کې دوه سيمه ييز پوليس تر تښتول کېدو وروسته وژل شوي دي.
د شاجوی ولسوال عبدالخالق وايي چې دغو دوو پوليسو د يادې ولسوالۍ په سيمه ييزو پوليسو کې دندې لرلې.
هغه زياته کړه، چې دا کسان د طالبانو له لوري څو ورځې مخکې تښتول شوي وو او پرون يې جسدونه موندل شوي دي.
ولسوال وويل چې وژل شوي کسان د شاجوی روغتون ته راوړل شوي او د قاتلينو د نيولو لپاره يې هڅې روانې دي.
د يادې ولسوالۍ يوې امنيتي سرچينې پژواک ته وويل چې ياد پوليس دوه ورځې مخکې د کابل – کندهار له لويې لارې څخه تښتول شوي وو.
د يادونې ده چې دوه اوونۍ مخکې په دغه ولايت کې ٣١ تنه مساپر هم د سپرليو له يوه موټر څخه تښتول شوي، خو تر اوسه يې برخليک نه دى معلوم.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن