وسله والو بلوچستان کې ٢٠ کارګر وژلي

کابل  (پژواک، ٢٢ ورى ٩٤): ناپېژانده وسله والو د پاکستان په بلوچستان ايالات کې د يوې پروژې ٢٠ کارګر وژلي دي.

پاکستانۍ رسنيو د وري په ٢٢مه خبر ورکړى چې دا پېښه تېره شپه ناوخته د بلوچستان ايالت په تربت سيمه کې رامنځته شوې ده.

سرچينې زياته کړې، يوه ډله وسله وال چې پر موټرسايکلونو راغلي وو، په تربت سيمه کې د يوه پول د جوړولو د کارکوونکو پر خېمو ډزې کړې او ٢٠ کسان يې وژلي دي.

د سرچينې د معلوماتو له مخې، په دغه بريد کې يو شمېر کسان ټپيان شوي هم دي چې ځايي روغتون ته لېږدول شوي دي.

په راپور کې راغلي چې وژل شوي د پاکستان د سيند ايالت اوسېدونکي وو .

تر اوسه د دغه بريد مسووليت کومې ډلې پر غاړه نه دى اخيستى.

login or register a new account.