هرات (پژواک، ١٧ زمرى ٩٤): د هرات د ښاري څارنوالۍ چارواکي وايي چې د دغه ولايت په مرکزي زندان کې يوه زنداني ځان زندۍ کړى دى.
د هرات د ښاري څارنوالۍ مشر ګل احمد رامش پژواک خبري اژانس ته وويل، ياد زنداني چې د شينډنډ ولسوالۍ اوسېدونکى و، د خپل ورور د قتل په تور په ١٢ کلونو زندان محکوم شوى و.
هغه وويل چې دغه کس د خپل زندان دوه کاله موده تېره کړې وه.
د رامش په وينا، ياد زنداني دوه ورځې وړاندې د زندان له چارواکو غوښتي و چې هغه د زندان انفرادي خونې ته ولېږدوي.
د هرات د ښاري څارنوالۍ مشر زياته کړه، چې دغه کس پرون انفرادي خونې ته له لېږد وروسته ځان د خپل دوسمال په وسيله زندۍ کړى دى.
ګل احمد رامش د دې خبرې په څرګندولو سره چې له تېرو دوو کلونو راهيسې د ياد زنداني کوم خپلوان د هغه ليدنې ته نه و راغلى، څرګنده کړه چې نوموړي د رواني او روحي ستونزو له امله په دغه عمل لاس پورې کړى دى.
د پژواک له هڅو سره سره د هرات زندان چارواکو د نظر له څرګندولو ډډه وکړه.
د هرات زندان چې د ښځو او نارينه وو لپاره جلا جلا برخې لري، د هېواد د لويو زندانونو له ډلې بلل کېږي.
د سيمه ييزو چارواکو په وينا، اوسمهال په دغه زندان کې د ٢٠٠ ښځو په ګډون درې زره زندانيان د بند شپې او ورځې سبا کوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن