فيض اباد، زرنج(پژواک، ٢٢ زمرى ٩٤): د بدخشان ولايت د ملي امنيت يو چارواکى د وسلې پر ډزو ووژل شو او په نيمروز کې دوه تنه پر دولتي مامورينو د بريد په تور ونيول شول.
د بدخشان د ملي امنيت رياست يوې سرچينې پژواک خبري اژانس ته وويل چې د ارغنچخواه ولسوالۍ د ملي امنيت مرستيال مدير ډګروال انوربېګ تېر مازديګر له دندې څخه په غله دره کلي کې خپل کور ته روان و چې د طالبانو له کمين سره مخ شو.
سرچينې زياته کړه چې هغه په دې پېښه کې وژل شوى، خو د پېښې په تړاو څوک نه دي نيول شوي او څېړنې روانې دي.
طالبانو په خپله ويبپاڼه کې ددې وژنې مسووليت منلى او ويلي يې دي چې انور بيګ د ارغنچخواه ولسوالۍ د ملي امنيت مدير و.
تېر کال هم طالبانو د بدخشان په جرم ولسوالۍ کې پر دولتي کاروان بريد وکړ چې د ملي امنيت دوه کارکوونکي يې ووژل، خو د ملي امنيت مشر ترې روغ ووت.
په نيمروز کې دوه وسله وال مخالفين هم له وسله والو مخالفينو سره د همکارۍ په تړاو ونيول شول.
د نيمروز امنيه قوماندان مل پاسوال دلاورشاه دلاور پژواک ته وويل چې دا دوه تنه اوس د نيمروز مرکز زرنج ښار ته راغلي وو او غوښتل يې چې تخريبي فعاليتونه تر سره کړي.
د نيمروز د ملي منيت يوه سرچينه وايي چې د دوى موظفينو تېره شپه دا دوه تنه د زرنج په ښار کې نيولي او له دوى څخه يې يوه تومانچه، ځينې مهمات او تبليغاتي پاڼې هم تر لاسه کړي دي.
هغه وويل چې دا کسان د فراه ولايت اوسېدونکي دي او هوډ يې درلود چې ځينې دولتي کارکوونکي ووژني .
دا په داسې حال کې ده چې په وروستۍ يوه اوونۍ کې په زرنج ښار کې د امنيتي پوستې يو قوماندان او يو پوليس د نا پېژندانه وسله والو له خوا ووژل شول.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن