کندوز(پژواک، ٢٩ زمرى ٩٤): دوه ملکي وګړي او دوه سيمه ييز پوليس د کندوز ولايت په امام صاحب ولسوالۍ کې د سړک غاړې ماين د چاودنې له امله ووژل شول او درې نور ماين اېښودونکي د ماين په چاودنه کې له منځه لاړل.
د امام صاحب ولسوال امان الدين قريشي وايي چې دواړه پوليس نن سهار د ارباب خليل پله سيمه کې پر ګزمه بوخت وو چې د ماين چاودنې په سبب ووژل شول.
هغه، پژواک خبري اژانس ته وويل چې دوه ملکي لارويان هم په دې پېښه کې وژل شوي دي.
قريشي زياته کړه چې تېره ورځ ماښام درې ماين اېښودونکي چې غوښتل يې تر اقي باى پله لاندې ماين کېږدي، خو ماين يې د خپلې وارخطايۍ په سبب د پول په شاوخوا سل مترۍ کې چاودېدلى او درې واړه په کې وژل شوي دي.
د امام صاحب ولسوال وايي ، وسله والو مخالفينو هوډ کړى و چې دا پول ويجاړ کړي او له دې لارې قرغان تپې سيمه کې د سيمه ييزو پوليسو يوه پوسته ونيسي.
طالبانو په دې اړه څه نه دي ويلي، خو طالب وياند ذبيح الله مجاهد وايي چې د کندوز چهادرې ولسوالۍ کې يې دوه پوليس د ماين په چاودنه کې وژلي دي.
د يو بل خبر له مخې، هغه کس چې په يوه لس کلن ماشوم يې جنسي تېرى کړى و، د پوليسو له خوا نيول شوى دى.
د کندوز امنيه قوماندانۍ وياند سيد سرور حسيني وايي چې دې کس تېره ورځ ماشوم تېر اېستلى، په کندوز ښار کې يې يوه کورته وړى او وروسته يې د چاقو تر ګواښونو لاندې پرې جنسي تېرى کړى ، چې په څلورمه امنيتي حوزه کې د پوليسو له خبرتيا سره سم ونيول شو او په خپل جرم يې اعتراف وکړ.
د حسيني په خبره، د ماشوم روغتيايي وضعيت ښه نه دى او د پوليسو له لوري د کندوز حوزوي روغتون ته وړل شوى دى.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن