کابل (پژواک،٢٣وږى٩٤): د ملي امنيت موظفينو په ننګرهار او پکتيکا ولايتونو کې د القاعدې شبکې يو قوماندان او دوه ځانمرګي بريد کوونکي وژلي دي.
دغه څرګندونې په هغو خبرپاڼو کې شوې دي چې د ملي امنيت د مطبوعاتي دفتر له لوري د وږي په ٢٣مه پژواک خبري اژانس ته رسېدلې دي.
د خبرپاڼې له مخې، د ننګرهار ولايت د لعلپورې ولسوالۍ لپاره د طالبانو نومول شوي ولسوال ګل اغا او په دې ولسوالۍ کې د طالبانو پوځي مسوول عبدالعليم اولزي غوښتل چې دوه ځانمرګي بريدونکي له موټر بم سره يو ځاى جلال اباد ښار ته داخل کړي.
د سرچيني په حواله، طالبانو هوډ درلوده چې دغه کسان د ځانمرګي بريد له واسکټونو سره يوځاى د مومند درې ولسوالۍ د غوث اباد له ګردي سيمې څخه جلال اباد ښار ته رهنمايي کړي.
خو په خبرپاڼه کې ليکل شوي چې په ياده سيمه کې د ملي امنيت د ځواکونو او يادو کسانو ترمنځ نښته شوې چې په ترڅ کې يې ځانمرګي بريدکونکي وژل شوي او موټر بم هم له منځه تللى دى.
دغه راز د ملي امنيت د يوې بلې خبرپاڼې له مخې، د ملي امنيت موظفينو د پکتيکا ولايت په ګومل ولسوالۍ کې د القاعدې شبکې د خرم په نوم يو قوماندان وژلى دى.
د اخبرپاڼې په حواله، افغان او بهرنيو ځواکونو د ګومل ولسوالۍ په پنځو سيمو کې د وسله والو مخالفينو پر مرکزونو بريدونه کړي دي.
سرچينه ليکي چې د دې ګډو عملياتو په ترڅ کې ياد شوى قوماندان او اووه نور ملګري يي وژل شوي دي.
د يادو کسانو د وژل کيدو په اړه تراوسه طالبانو او يا هم القاعدې شبکې څه نه دي ويلي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن