د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

ولسمشر غني د کندوز پېښې په تړاو درې کمېسيونونه ګومارلي

ولسمشر غني د کندوز پېښې په تړاو درې کمېسيونونه ګومارلي

Oct 01, 2015 - 21:01

کابل (پژواک ٩ تله ٩٤): ولسمشر اشرف غني امنيتي، ملکي او څېړنيز درې کميسيونونو ګومارلي، ترڅو د کندوز پېښې ته لاسرسى وکړي او په اړه يې څېړنه وکړي.

نوموړي، دغه څرګندونې نن (د زمري نهمه) ماښام د يوې خبرې ناستې پرمهال وکړې.

کندوز ښار څلور ورځې وړاندې (د تلې ٦مه) د طالبانو له خوا ونيول شو، خو تېره شپه بېرته د افغان ځواکونو، چې د بهرنيو ځواکونو (پرېکنده ماموريت) هوايي ملاتړ ورسره وو، لاس ته ورغى.

ولسمشر اشرف غني په ياده ناسته کې وويل، لومړى کميسيون چې امنيتي دى او فعاليت يې تېره ورځ پيل کړى، د کندوز ټولې لارې يې تر کنټرول لاندې دي او غير مسوولو کسانو ته به کندوز ښار ته د ننوتلو اجازه نه ورکوي، ځکه يواځې د هېواد امنيتي او دفاعي ځواکونه به د قانون د حاکميت د پلي کېدو لپاره عمل کوي.

 هغه زياته کړه، دوهم ملکي کميسيون دى، چې دا کميسيون به د کندوز ښار ته د رسېدلو زيانونو په اړه بېړنۍ څېړنه کوي، ترڅو د همدې راپور پربنسټ، ټول زيانونه وڅېړل شي او له مخې يې په ځانګړي ډول د ښار بې ځايه شويو کسانو ته اسانتياوې برابرې کړي.

د نوموړي په وينا، درېيم د څېړنې کميسيون دى، چې د کندوز د پېښې په تړاو به په سړه سينه څېړنه کوي او د پېښې په تړاو به د خلکو بنسټيزو پوښتنو ته ځواب ورکوي. دغه کميسيون به د راتلونکې شنبې په ورځ (د تلې ١١مه) وټاکل شي.

ولسمشر وايي: "يو دولت چې په قانون باور لري، صحرايي عدالت نه شي ترسره کولى؛ هر چا چې وظيفوي غفلت کړى، د قانون پربنسټ به يې غفلت يا خيانت تثبيتېږي او د هغه له مخې به مجازات کېږي؛، په ورته وخت کې هغه کسان چې فداکاري يې کړې، هغوى به ستايل کېږي."

ده د زياتو جزئياتو له ورکولو پرته وويل، چې د کندوز د پېښې په تړاو يو شمېر کسان نيول شوي او څېړنې ترې روانې دي.

اشرف غني وويل، د کندوز پېښې ثابته کړه، هغه کسان چې د واسطې، سياسي نفوذ او وسيلې له لارې ټاکل شوي وو، له بده مرغه دا هغه کسان وو، چې د پېښې په لومړيو کې يې صحنه پرېښوده او وتښتېدل؛ بالعکس هغه کسان چې د فرد په توګه او رضاکار شامل شوي وو، هغوى د خپلې مټې او فداکارۍ پربنسټ مخ ته ولاړل او ثابته يې کړه، چې د دې هېواد لپاره قرباني ورکوي، نو بايد چې وستايل شي.

دى زياتوي: "هېڅوک د اوضاع له خرابوالي او پر امنيتي ځواکونو د بې اعتمادۍ فضا رامنځ ته کولو څخه ګټه نه شي پورته کولى، موږ د بيان ازادۍ ته احترام وي، خو هغه ازادي چې د هغو اصولو په چوکاټ کې وي، چې ملي ګټو ته په کې لومړيتوب ورکول شو، نو زموږ غوښتنه دا ده، چې د همدې ملي ګټو په چوکاټ کې عمل وشي او هغه رعايت شي."

ولسمشر له ټولو هغو کسانو څخه، چې کندوز ښار ته يې له مخالفينو سره د جګړې کولو لپاره د تګ هوډ درلود، مننه وکړه، خو ويې ويل: "د وسلې استعمال يواځې د دولتي د مقرراتو په چوکاټ کې ترسره کېداى شي، د وطنپرستۍ له دغې روحيې څخه هرکلى کوو، خو زموږ هيله دا ده، چې ټول دغه کسان د اردو، پوليسو او ملي امنيت جلب او جذب ته وهڅول شي، ترڅو هملته خپل مسووليت ترسره کړي."

هغه زياته کړه، هيله ده، د کندوز د پېښې په اړه د امنيتي او دفاعي ځواکونو د تصميم او يا ظرفيت په برخه کې د شک او ترديد کومه فضا رامنځ ته شوې وه، له منځه تللې وي.

نوموړي د کندوز ښار د بېرته نيولو په برخه کې له ټولو امنيتي ځواکونو د مننې څرګندولو ترڅنګ وويل، د کندوز ښار د نيولو عمليات په برياليتوب ترسره شول او هېڅ کوم امنيتي کس په کې نه دى وژل شوى.

غني وايي: "د کال له پيله مو ويلي و، چې سږکال به په امنيتي او دفاعي برخو کې د جنګ او ملي ازموينې تر ټولو سخت کال وي؛ له بده مرغه زموږ وړاندوينه سهي راوخته، خو له نېکه مرغه زموږ د وړاندوينې له مخې، زموږ دفاعي ځواکونو وکولى شول له دغه تحميلي جنګ سره مقابله وکړي."

خو هغه يادونه وکړه، چې د کندوز بېرته نيول بايد د دوى د غفلت لامل نه شي، ځکه لا تراوسه جګړه دوام لري، امنيتي او دفاعي ځواکونو همدا نن له کندوز سربېره په نورو ولايتونو کې هم فعاليت درلود، پرمختګونه يې لرل، ولې له ستونزو سره هم مخامخ وو.

ولسمشر وويل، هغه څوک چې د افغانستان د خلکو ژوند، امنيت، مال او حيثيت ته اهميت نه ورکوي، په هر نوم چې ځان نوموي، د افغانستان دښمنان دي او لارښوونه يې داده، چې ټول امنيتي ځواکونه د دغسې کسانو پر وړاندې ودرېږي.

نوموړي د دې خبري ناستې په پاى کې، د دې پوښتنې په ځواب کې چې پخوا يې ولې په کندوز کې د عمليات ترسره کېدو اجازه نه ده ورکړې، وويل، هېڅکله يې په کندوز کې د عملياتو د ترسره کېدو مخنيوى نه دى کړى، ځکه هره قوه له پورته څخه نيولې تر ښکته پورې د جلا اجازې اخيستو ته اړتيا نه لري او ټولو ته د پوځي عمليات ترسره کېدو اجازه له مخکې ورکړل شوې.

دغه راز ولسمشر د دې پوښتنې په ځواب کې، چې يو شمېر د ملي شورا غړي، جهادي قوماندانان او ځينې نور کسان ادعا لري، چې په حکومت کې دننه داسې کسان شته، چې د هېواد په ناامنيو او په ځانګړي ډول د کندوز په سقوط کې ښکېل دي، وويل، هر سياسي او جهادي شخصيت چې په دې اړه اسناد لري، د ملي امنيت رياست او د کندوز د پېښې له ټاکل شوي څېړنيز کميسيون سره دې يې شريک کړي؛ هر هغه څه چې د اسنادو، نه د شايعې له مخې موجود وي، پر هغې به عمل کېږي.

 

 

 

 

 

 

 

 

 

ورته راپورونه:

اعلانونه

Advertisement