کابل (پژواک ٢٧ تله ٩٤): د ملي امنيت عمومي رياست ويلي، په تخار کې د طالبانو د نومول شوي والي پنځه کسان يې چې په ترهګريزو کړنو تورن دي، نيولي دي.
د يادې ادارې له لوري پژواک خبري اژانس ته په رالېږل شوې خبرپاڼه کې ويل شوي، چې دغه کسان په دوو بېلابېلو عملياتو کې د تخار ولايت د دښت کلا او خواجه غار ولسواليو په اړوندو سيمو کې نيول شوي دي.
ملي امنيت د دغو کسانو د نيولو له نېټې ښودلو پرته زياته کړې، نيول شوي کسان د دغه ولايت لپاره د طالبانو د نومول شوي والي قاري امين الله طيب کسان دي.
د يادې خبرپاڼې په دوام کې څرګنده شوې، چې تورن کسان د دغه ولايت اصلي اوسېدونکي دي، چې د دولتي کارکوونکو په ترور، د سړک غاړې ماينونو په خښولو او د ښوونځيو په سوځولو کې يې لاس درلود.
په خبرپاڼه کې د دغو کسانو نومونه عبدالرزاق چې مستعار نوم يې (عسکر)، محمد طيب (عاشق الله)، محمد رسول، خادم الله (خنجر) او سميع الله (صبور) ياد شوي دي.
طالبانو تر اوسه پورې په دې اړه څه نه دي ويلي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن