کابل (پژواک، ۲۳ لړم، ۹۴): ولسمشر غني وايي، د ولايتي شورا غړي په انفرادي ډول د ولايت په چارو کې د څارنې او لاسوهنې حق نه لري او د مداخلې په صورت کې به تر قانوني تعقيب لاندې ونيول شي.
نوموړي دغه څرګندونې نن سهار له واليانو، د ټولو ولايتونو د ولايتي شوراګانو له اداري پلاوو، امنيه قوماندانانو او د ولايتونو د ملي امنيت له مشرانو سره د وېډيو کنفرانس له لارې وکړې.
په هغې خبرپاڼه کې، چې د ولسمشرۍ ماڼۍ له خوا پژواک خبري اژانس ته رارسېدلې، راغلي چې ولسمشر له ګډونوالو په ناامنه ولسواليو کې د حکومت د حضور د پياوړتيا، د ځمکو د غصب د مخنيوي، د غصب شوې ځمکې او غاصبينو د فهرست او اندازې د برابرولو او د هېواد له امنيتي او دفاعي ځواکونو څخه د ملاتړ په برخو کې د موثرې همغږۍ او همکارۍ مننه وکړه.
سرچينې د ولسمشر له قوله ويلي، د حکومت په پرمختيايي چارو کې د ولايتي شوراګانو د مشارکت د ښه والي په خاطر د هېواد د نافذه قوانينو مطابق د ولايتونو په دويم سل ورځني پلان کې ګټورې او موثرې برنامې ځاى کړې دي.
هغه د ولايتي شوراګانو غړو ته ډاډ ورکړى، چې ولايتي شوراګانې په سيمه ييزه حکومتوالۍ کې د خلکو د استازو په توګه اساسي رول ولري.
نوموړي د ولايتي شوراګانو څارونکي رول ته په اشارې وايي: "د ولايتي شورا هېڅ غړى په انفرادي توګه د ولايت د ادارو په چارو کې د څارنې او مداخلې حق نه لري او د ولايتي شورا هر غړى چې د ولايت د ادارو په چارو کې مداخله وکړي، نو تعقيب به شي."
ولسمشر د ولايتي شوراګانو ټاکنو ته په اشارې ويلي، د ټاکنو خپلواک کميسيون د ټاکنو له قانون سره سم د ولايتي شوراګانو د اداري پلاوي د ټاکنو د ترسره کولو مسووليت لري.
هغه د ټاکنو کميسيون ته لارښوونه کړې، چې سبا (د لړم ۲۴مه) په ټول هېواد کې د ولايتي شوراګانو د اداري پلاوي ټاکنې رڼې او پر يو وخت ترسره کړي.
اشرف غني وايي: "هېچا ته به د ولايتي شوراګانو د داخلي ټاکنو د اوږدولو او په هغو کې د مداخلې اجازه نه ورکول کېږي او همدارنګه واليان مکلف دي، چې د شفافو ټاکنو د ترسره کولو زمينه برابره کړي او امنيتي ځواکونه دې د يادو ټاکنو امنيت تامين کړي."
د ده په وينا، د سيمه ييزو ارګانونو خپلواکه اداره دنده لري، چې د ولايتي شوراګانو مالي خپلواکي، چې د سيمه ييزې حکومتوالۍ د پاليسۍ په تعديل کې يې وضاحت ورکړل شوى دى، نهايي کړي.
هغه زياته کړې، د ۱۵ ولايتي شوراګانو ودانۍ بشپړې شوې، د ۶ ولايتي شوراګانو په ودانيو کار دوام لري او هڅه کېږي، د نورو ولايتونو د ولايتي شوراګانو د ودانيو کار هم بشپړ شي.
ولسمشر ويلي، د ۱۳۹۵ل کال په بودجه کې د ټولو ولايتي شوراګانو لپاره نقليه وسايط هم په پام کې نيول شوي دي او په نږدې راتلونکي کې به داستخدام قانون ته په پام د ولايتي شوراګانو د ملکي خدماتو کارکوونکي د ولايت له تشکيل څخه جلا او په مستقل ډول د ولايتي شوراګانو په خدمت کې وي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن