کندهار ( پژواک، ٣٠ لړم ٩٤ ) : د کندهار- سپين بولدک پر لويه لاره منډيسار سيمې ته څېرمه دوه چاودنې شوي، خو تلفات نه لري.
د کندهار د امنيه قوماندانۍ وياند ضيا دراني د لړم په ٣٠مه، پژواک خبري اژانس ته وويل، پوليسو د کندهار- سپين بولدک پر لويه لاره د منډيسار په سيمه کې د سړک پر غاړه خښ شوي ماينونه کشف کړي وو، چې تر خنثى کېدو مخکې چاودېدلي دي.
هغه زياته کړه چې په دې چاودنو کې هيڅ چا ته زيان نه دى اوښتى.
نوموړى دا نه مني چې ګواکې دغه چاودنې دې پر جنرال رازق شېرزي او نياز محمد کاکوزي شوې وي.
خو د وسله والو طالبانو وياند قاري يوسف احمدي وايي، د ٢٠٥ اتل قول اردو د هوايي لوا د قوماندان جنرال رازق شېرزي او د ولايتي شورا د غړي نياز محمد کاکوزي پر موټرو يې چاودنې کړي، خو په اړه يې نور معلومات نه لري چې هغوى ته په کې زيان اوښتى او که نه؟
ياد شوي دواړه چارواکي له دې پېښو روغ وتلي، خو يواځې د جنرال رازق د سورلۍ موټر يو څه زيانمن شوى دى.
د يوه بل خبر له مخې، په ميوند ولسوالۍ کې د امنيتي ځواکونو په عملياتو کې درې وسله وال وژل شوي او دوه نور ټپيان شوي دي.
درانى وايي، عمليات د ميوند په ګرماوک سيمه کې شوي، چې پر مهال يې درې وسله وال وژل شوي او درې نور ټپيان شوي دي.
دى وايي، د وژل شوو مخالفينو جسدونه او وسلې د جګړې په ډګر کې پاتې شوي.
دغه راز په همدې ولسوالۍ کې په يوه ترافيکي پېښه کې يو ملکي وګړى هم مړشوى چې په دې ولسوالۍ کې يې د ميراب دنده لرله.
د امنيې قوماندانۍ وياند وايي، ترافيک پوليسو په دې اړه پلټنې پيل کړې دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن