ښرنه ( پژواک، ٥ مرغومى ٩٤) : تر اوږده ځنډ وروسته د پکتيکا د و لايتي شورا ټاکنې چې د خپلمنځي اختلاف له امله ځنډېدلې وې، ترسره شوې.
د ولايتي شورا د اداري پلاوي ټاکنې د مرغومي په ٥مه، په دې ولايت کې د ټولټاکنو د خپلواک کمېسيون د ولايتي چارواکو او نورو تر نظارت لاندې ترسره شوې.
ددې ټاکنو په پايله کې بختيار ګل همت ځدراڼ د ولايتي شورا د مشر، نعمت الله بابري د مرستيال او حنيفه کټوازۍ د منشي په توګه وټاکل شول.
د ولايتي شورا پخواني مشر افسر خان سليمان خېل وويل چې تر خپله وسه او توانه به نويو مشرانو سره اوږه په اوږه کار وکړي.
د ولايتي شورا نوي رييس بختيار ګل تر ټاکل کېدو وروسته پژواک ته وويل چې د دولت او ولس ترمنځ به دا شورا د پله حثيت ولري او د ولس هره غوښتنه او هيله به تر دولتي چارواکو او مرکزي دولت پورې ورسوي.
هغه زياته کړه، دا ځل ټاکنې د ولايتي شورا د ټولو وکيلانو په شتون کې تر سره شوې او هغه اختلافات چې له دې وړاندې د دوی په منځ کې و ، له منځه وړل شوي دي.
د ولايتي شورا يوه وکيل چې نه غواړي نوم يې خپور شي، پژواک ته وويل، چې له دې وړاندې په دې شورا کې د پخواني مشر افسر خان او او سني رييس بختيار ګل تر منځ د رياست په سر ستونزې وې.
د هغه په وينا، ددې ستونزو له امله ولايتي شورا په دوه برخو کې ويشل شوې وه ، يوې برخې يې ټاکنې وکړې ، خو بلې ورسره ونه منله.
د يادونې ده چې د پکتيکا ولايتي شورا ۹ غړي لري، چې دوه يې مېرمنې دي .
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن